Suksesi 4-2 i Paris Saint-Germain ndaj Barcelonës, në spektaklin futbollistik të zhvilluar mbrëmë (e martë) në Paris, është shoqëruar me shqetësim për gjendjen e Khvicha Kvaratskhelias. Kampionët në fuqi të Evropës përballen me mundësinë që anësori i tyre i majtë të ketë pësuar një dëmtim të rëndë.
Pas përfundimit të takimit, gazeta L’Equipe raportoi se Kvara rrezikon të mos luajë më gjatë pjesës së mbetur të sezonit. Sipas saj, te PSG ekziston frika se futbollisti ka këputur ligamentet e kryqëzuara. Për sot është parashikuar një ekzaminim me rezonancë magnetike, ndërsa vlerësimet e para mjekësore janë tejet të rënda. Konfirmimi i tyre do të nënkuptonte fundin e sezonit për Kvaratskhelian.
Të lidhura
None found
Gjeorgjiani, i konsideruar ndër futbollistët më të mirë në botë, e ndërpreu ndeshjen në minutën e 59-të. Dëmtimi ndodhi në një përballje me Xavi Espart, lojtarin e ri të Barcelonës, pas së cilës ai mbeti i shtrirë në fushë. Pamjet e atij momenti qarkulluan me shpejtësi në rrjetet sociale.
Reagimi i menjëhershëm i stafit mjekësor të PSG-së, që vrapoi për t’i dhënë ndihmë, tregoi shqetësimin për situatën. Edhe kapiteni i parisienëve, Marquinhos, u detyrua ta linte lojën, por rasti i Kvaratskhelias ishte ndryshe: ai thuajse u nxor nga fusha.
Një mungesë e detyruar deri në verë e Kvaratskhelias do të përbënte një humbje të madhe për skuadrën më të mirë të Evropës. Ai ka pasur rol vendimtar për PSG-në në fitimin e Ligës së Kampionëve vitin e kaluar dhe këtë vit. Klubi parisien e transferoi nga Napoli në janar të vitit të kaluar, duke paguar 80 milionë euro.
