Protesta e kamionistëve boshatis supermarketet në Napoli, italianët në panik: Është shumë më keq se Covid

Greva e transportuesve të mallrave ka shkaktuar mungesa në raftet e supermarketeve dhe në disa pika karburanti në qytetin e Napolit, në jug të Italisë. Protesta, e cila po vazhdon prej një jave, lidhet me rritjen e ndjeshme të çmimit të naftës, të nxitur nga lufta me Iranin. Të martën, disa supermarkete raportuan mungesa të produkteve, ndërsa shoferët e kamionëve kërkojnë masa për të përballuar kostot e larta të transportit.

Sipas raportimeve të mediave italiane, të hënën protestuesit bllokuan ngarkimin dhe shkarkimin e produkteve ushqimore dhe mallrave të tjera në magazinat e shpërndarjes pranë Napolit. Në një prej supermarketeve të qytetit, klientët u njoftuan për mungesa të përkohshme dhe për një përzgjedhje më të kufizuar produktesh. Probleme janë raportuar edhe në Siçili, ku mungojnë makarona të freskëta, djathëra, mishra të paketuar dhe produkte të freskëta, ndërsa një pjesë e mungesave lidhet edhe me blerjet e tepërta nga konsumatorët.

«Është shumë më keq se Covid», shprehen disa banorë të Napolit, duke përshkruar shqetësimin për mungesat dhe pasigurinë mbi furnizimin me produkte të përditshme.

Raftet pjesërisht të zbrazëta janë raportuar gjithashtu në rajonet jugore të Kalabrisë dhe Pulias. Protestat e transportuesve italianë janë pjesë e një vale më të gjerë demonstratash në Evropë, ku rritja e kostove të energjisë dhe ndërprerjet ekonomike të lidhura me luftën po rëndojnë sektorin e transportit.

Ministri italian i Transportit, Matteo Salvini, u takua të martën me përfaqësuesit e shoqatave kombëtare të transportuesve, duke premtuar kredi tatimore për të kompensuar rritjen e çmimit të naftës, si dhe fonde për modernizimin e tarifave të transportit. Çmimi i naftës është rreth një të tretën më i lartë se përpara luftës me Iranin, pavarësisht përpjekjeve të qeverisë për të kufizuar kostot në pikat e karburantit. Një ulje e përkohshme e taksës mbi naftën përfundoi në fillim të këtij muaji.

Paolo Uggè, president i grupit të shoqatave të transportuesve Unatras, deklaroi se Salvini ka premtuar që pagesat mbështetëse të nisin të mërkurën, ndërsa është zotuar edhe për masa ligjore që synojnë të trajtojnë kostot operative të sektorit. Një takim tjetër mes palëve është planifikuar për javën e ardhshme, ndërsa mbetet për t’u parë nëse masat do të mjaftojnë për të zgjidhur konfliktin dhe për të normalizuar furnizimin me mallra.