Gazeta franceze “Courrier Picard” i ka kushtuar një artikull biznesmenit Ermal Beqiri, i cili mbahet i burgosur në Francë dhe kërkohet nga drejtësia shqiptare.
Sipas gazetës franceze, Beqiri ka kërkuar sërish lirimin përpara dhomës së hetimeve të Gjykatës së Apelit në Amiens, ndërsa vendimi për kërkesën e tij pritet të premten.
Sipas Courrier Picard, biznesmeni shqiptar vijon të mbahet në burgun e Beauvais, ndërsa përmes kërkesës së tij të re synon të fitojë lirinë. Gazeta franceze thekson gjithashtu se Beqiri dëshiron të qëndrojë në Francë.
Kujtojmë se biznesmeni Ermal Beqiri u arrestua në Francë më 24 korrik 2026, pasi ishte shpallur në kërkim ndërkombëtar me kërkesë të Prokurorisë së Posaçme (SPAK), në kuadër të hetimeve për çështjen e tenderave të Agjencisë Kombëtare të Shoqërisë së Informacionit (AKSHI). Arrestimi i tij u krye në një rrethanë të pazakontë, pasi kishte fluturuar me një avion të vogël civil mbi zonën e kufizuar të centralit bërthamor të Penly-t, në veri të Francës.
Sipas SPAK-ut, ndaj Beqirit ishte caktuar masa e sigurisë “arrest në burg” që në dhjetor 2025. Hetimi lidhet me dyshimet për parregullsi në procedurat e prokurimit publik dhe veprimtari të tjera të dyshuara kriminale.
Biznesmeni hetohet për veprat penale të konkurrencës së paligjshme nëpërmjet dhunës, heqjes së paligjshme të lirisë, shkeljes së barazisë së pjesëmarrësve në tendera ose ankande publike, pjesëmarrjes në grup të strukturuar kriminal, kryerjes së veprave penale në kuadër të një organizate kriminale ose grupi të strukturuar kriminal, pastrimit të produkteve të veprës penale dhe korrupsionit aktiv të personave që ushtrojnë funksione publike.
Hetimet lidhen edhe me aktivitetin e kompanisë “Soft & Solution”, e cila operon në fushën e teknologjisë dhe shërbimeve dixhitale. Sipas raportimeve mbi dosjen, SPAK dyshon se procedurat e tenderimit janë manipuluar në favor të subjekteve të caktuara. Në një prej episodeve të hetuara, dyshohet se një konkurrent është përballur me presion për t’u tërhequr nga gara për një tender publik.
Sipas informacionit të bërë publik nga SPAK-u, autoritetet shqiptare kërkuan mbështetjen e strukturave franceze më 19 qershor 2026, pasi dyshohej se Beqiri ndodhej në Francë. Ai ishte shpallur në kërkim ndërkombëtar përmes një njoftimi të kuq të Interpolit.
Më 24 korrik, autoritetet franceze ndërhynë pasi avioni i vogël që drejtonte Beqiri hyri në hapësirën ajrore të kufizuar të centralit bërthamor të Penly-t. Sipas raportimeve mediatike, ai u detyrua të ulej në aerodromin e Albert-it dhe më pas u vu në dispozicion të autoriteteve franceze për procedurat ligjore. Për shkeljen e rregullave të fluturimit, mediat raportuan se iu shqiptua një gjobë prej 7 mijë eurosh.
Në vijim të hetimeve financiare, SPAK bëri të ditur se autoritetet franceze kishin identifikuar llogari bankare me vlerë mbi 2 milionë euro, dy apartamente dhe një kështjellë në departamentin e Oise, me vlerë të raportuar rreth 2.6 milionë euro, si dhe pasuri të tjera. Prokuroria po ndiqte procedurat për identifikimin, sekuestrimin dhe konfiskimin e pasurive që dyshohet se kanë origjinë kriminale.
SPAK njoftoi gjithashtu se kërkesa zyrtare për ekstradimin e Beqirit drejt Shqipërisë iu përcoll autoriteteve franceze përmes Ministrisë së Drejtësisë.
Çështja e Beqirit është pjesë e hetimeve më të gjera për procedurat e prokurimit publik të AKSHI-t, ku SPAK po verifikon dyshimet për manipulim tenderash, korrupsion dhe veprimtari të organizuar kriminale.
