Kim Kardashian ka surprizuar ndjekësit me një maskim të pazakontë për Halloween, duke u shndërruar në vajzën e saj 12-vjeçare, North West. Ylli televiziv ka rikrijuar me përpikëri pamjen dhe stilin karakteristik të së bijës, nga flokët blu të ndezur te piercing-et dhe aksesorët e veçantë.
North West është kthyer gjithnjë e më shumë në qendër të vëmendjes për stilin e saj individual dhe ekstravagant, i cili karakterizohet nga flokë me ngjyra të forta, bizhuteri të mëdha, piercing-e dhe çizme të zeza me platformë të trashë. Pikërisht këto elemente u bënë pjesë e maskimit të Kim Kardashian, e cila u kujdes të mos linte asnjë detaj pa imituar.
Përmes fotografive dhe videove të publikuara në Instagram, Kardashian prezantoi transformimin e saj, duke kombinuar bizhuteri të mëdha argjendi, unaza dhe një gjerdan me kafkë, në një pamje që pasqyronte stilin e guximshëm të vajzës së saj.
Por ajo që e bëri maskimin edhe më të veçantë ishte fakti se Kim nuk u përqendrua vetëm te veshja dhe aksesorët. Në njërën prej videove, ajo imitoi edhe mënyrën se si North lëviz dhe sillet, duke e bërë ngjashmërinë edhe më bindëse.
Postimi tërhoqi menjëherë vëmendjen e ndjekësve, të cilët reaguan me habi dhe entuziazëm në komente. Disa prej tyre pranuan se, në pamje të parë, kishin menduar se bëhej fjalë për vetë North West dhe jo për të ëmën e saj.