Guvernatori i Bankës së Shqipërisë, Gent Sejko, u ka përcjellë një mesazh sigurie qytetarëve shqiptarë lidhur me depozitat e tyre bankare, duke theksuar se, pavarësisht tensioneve të krijuara në vend dhe incidenteve të regjistruara ndaj disa bankomateve gjatë protestave, sistemi bankar dhe financiar ka vijuar të funksionojë normalisht, ndërsa bankat paraqiten të mirëkapitalizuara dhe me nivele të mira likuiditeti.
Gjatë fjalës së mbajtur në takimin me kryeministrin Edi Rama dhe drejtuesit e sistemit bankar në Shqipëri, Sejko bëri të ditur se Banka e Shqipërisë ka vijuar të kryejë të gjitha funksionet e saj operacionale, duke i kushtuar vëmendje të veçantë funksionimit të sistemit të pagesave dhe qarkullimit të parasë fizike, me qëllim garantimin e vijimësisë së shërbimeve financiare për qytetarët dhe bizneset.
“Ne si Bankë e Shqipërisë i kemi pasur në funksionim të gjitha sistemet tona operacionale, përfshirë sistemin e pagesave dhe qarkullimin e parasë fizike, pasi fokusin kryesor e kemi pasur pikërisht te këto funksione operacionale. Edhe funksionet e tjera kemi vijuar t’i kryejmë normalisht, si në çdo kohë”, deklaroi guvernatori Sejko.
Ai nënvizoi se, pavarësisht tensionit dhe presionit të krijuar mbi sistemin bankar dhe financiar, qytetarët nuk duhet të kenë shqetësime për sigurinë e depozitave të tyre, duke theksuar se gjendja e bankave dhe kapacitetet e tyre financiare krijojnë kushtet për vijimin normal të aktivitetit.
“Ajo që kemi dashur të theksojmë është se, pavarësisht tensionit dhe presionit në sistemin bankar dhe financiar, depozitat e qytetarëve janë të sigurta. Bankat janë të mirëkapitalizuara dhe kanë një likuiditet shumë të mirë”, u shpreh Sejko.
Në vijim të deklaratës së tij, guvernatori theksoi rëndësinë që ka ruajtja e funksionimit të sistemit bankar, duke argumentuar se ky sektor është thelbësor për aktivitetin ekonomik dhe për jetën e përditshme të qytetarëve, pasi përmes tij kryhen pagesat, mbështeten bizneset dhe mundësohet qarkullimi i parasë në ekonomi. Sipas Sejkos, çdo cenim i sistemit bankar dhe financiar do të kishte pasoja të drejtpërdrejta për qytetarët dhe bizneset, duke krijuar vështirësi që do të ndikonin në funksionimin e përditshëm të ekonomisë. Për këtë arsye, ai theksoi se është e rëndësishme që veprimtaria e këtij sektori të vijojë pa ndërprerje, pavarësisht situatave të tensionuara.
“Sistemi bankar është në funksion të qytetarëve dhe bizneseve. Cenimi i sistemit bankar dhe i sistemit financiar i dëmton drejtpërdrejt bizneset dhe qytetarët, si dhe krijon problematika që kanë të bëjnë me jetën e gjithkujt. Prandaj, ne duam që ky sistem dhe kjo industri të vijojnë pa ndërprerje operativitetin, sepse, në të kundërt, pasojat do të ishin negative”, përfundoi guvernatori i Bankës së Shqipërisë, Gent Sejko.
