Rama: Banka e Shqipërisë nuk u sulmua as në ‘97, po përballemi me radikalizimin e të rinjve

Kryeministri Edi Rama tha se ajo që po ndodh me protestat në Shqipëri nuk duhet të krahasohet me trazirat e vitit 1997, pasi, sipas tij, vendi ndodhet në një kontekst krejtësisht të ndryshëm.

Në një takim me drejtuesit e sistemit bankar të mërkurë, Rama u shpreh se ajo që po ndodh lidhet me radikalizimin e një pjese të të rinjve, si dhe me ndikimin e elementëve të brendshëm dhe të jashtëm. Ai argumentoi se situata e krijuar në një zonë të kufizuar në qendër të Tiranës nuk përfaqëson shumicën e qytetarëve shqiptarë.

“Është tepër e rëndësishme të kuptojmë se ajo që po ndodh nuk ka lidhje me fantazmat e së kaluarës dhe as me vitin 1997. Sot jetojmë në një realitet tjetër. Kemi të bëjmë me njerëz që përpiqen të imponojnë botën e tyre me gurë, zjarr, kërcënime dhe trysni, duke e kthyer një perimetër në qendër të Tiranës në një skenë ku shfaqen persona të maskuar që përballen me policinë”, u shpreh kryeministri.

Ai u ndal te sulmi ndaj Bankës së Shqipërisë gjatë protestave, duke theksuar se institucioni nuk ishte prekur as gjatë trazirave të vitit 1997.

 “Jo gurin që ka kthyer në objekt sulmi Bankën e Shqipërisë, e cila nuk është sulmuar në vitin 1997, edhe pse nuk kishte banka të tjera. Banka të tjera ishin Sudja dhe Xhaferri. Banka e Shqipërisë nuk është prekur as në vitin 1997 dhe sot është prekur me gur. Ne do të adresojmë të gjitha problematikat duke nxjerrë detyrat që kanë të bëjnë me avancimin e mëtejshëm të ligjit që sot në qeveri e kemi kaluar për në Parlament për strehimin social të përballueshëm, ku sigurisht do të na duhet edhe bashkëpunimi me ju”, u shpreh Rama.