Kur një kufomë politike arrin të shohë qartë fundin e tij, atëherë do të bëjë gjithçka, me shpresën e pashpresë, se do ta shmangë atë. Për herë të parë në 35 vjet, Edi Rama ka regjistruar në historinë tonë politike terrorin më të madh policor kundër të rinjve dhe fëmijëve shqiptarë. E nëse dhuna shtetërore është treguesi i parë i kapitullimit të sigurtë të një regjimi, tentativat për të çuar vendin në luftë civile përfundojnë me tërheqjen zvarrë të tij.
Përveç mercenarëve me uniformë, regjimi po përdor metoda të juntave më të egra, duke mobilizuar civilë të maskuar për të mbjellë terror, ushtruar dhunë si dhe për të bërë diversion mes protestuesve.
Banda e gangsterëve me maska në selinë e Partisë Socialiste, që ditën sillen si protestues dhe natën dalin për të goditur pas shpine të rinjtë, është tashmë një fakt i dokumentuar i përdorimit të civilëve, që nuk janë pjesë e trupës policore, për të ushtruar terror në emër të Edi Ramës. Se ata po përdoren nga kryeministri, për të shmangur kalljen e tij në varrezën politike të satrapëve, këtë e vërteton si mosveprimi i prokurorëve të Tiranës, ashtu edhe heshtja e turpshme e zhvatësve mediatikë që vegjetojnë nën këmbët e Ramës.
Në të gjithë propagandën e fundregjimit flitet për studentët që mbajnë maska, për agjentët e Iranit e flamurët e Vatikanit, por a keni parë dikë që të ngrejë alarmin se kur civilët maskohen e armatosen për të goditur qytetarët, a po shkon vendi në luftë civile për interesin e Ramës? Ky shqetësim, i vetmi që kërcënon sot me gjakderdhje, nuk përmendet sepse rrëzon totalisht arsyetimin mbi të cilin po ushtohet terrrori shtetëror.
Televizioni News24 transmetoi pamje të një tjetër bande civilësh të maskuar që dilnin nga ministria e Brendshme dhe më pas si hije të zeza depërtonin nëpër grupe protestuesish duke u shtirur si pjesë e tyre.
Sipas informacioneve që Lapsi.al ka mundur të mbledhë nga grupe të ndryshme protestuesish, këta civilë janë kryesisht punonjës të administratës publike por edhe banditë ordinerë, që në pushtetin e Edi Ramës, njësoj si një pjesë e mercenarëve me uniformë, kanë kryer lirisht aktivitet kriminal në këmbim të votave për rilindjen. Këta civilë synojnë të afrohen me grupe të ndryshme protestuesish, të zbulojnë organizimin e tyre dhe më pas t’i godasin pas shpine. Në shumë raste raportohet se dalin edhe hapur, herë duke kërcënuar me forcën e banditit e herë duke ofruar para dhe vende pune në emër të pushtetit të kryebanditit.
Këta mercenarë, një pjesë e të cilëve janë identifikuar e regjistruar nga të rinjtë, po veprojnë nën shembullin e kryeministrit të pakallur. Në të njëjtën mënyrë Rama josh me para policët dhe bën diversion tek studentët, kërcënon se do ndalojë lëvizjen e lirë, do i heqë nga puna e nga shkolla, do i përndjekë e persekutojë. Në thelb është e njëjta tentativë dëshpëruese për të shmnagur fundin e sigurtë që tashmë është shndërruar në tërheqje zvarrë.
Studentët dhe qyetarët shqiptarë e kanë të qartë kauzën e tyre: Dorëheqjen e Edi Ramës. Dhuna e terrori, propaganda me Antifa e ajatollahë, shndërrimi i policisë në mercenare me pagesë dhe përdorimi i civilëve kundër të rinjve, vetëm rrit koston e largimit të tij. Kryeministri vetë mund të mbrohet me gardë, policë, ushtri e banda, por ata që sot ushtrojnë dhunë apo heshtin kur shohin fëmijë që u thyhen gjymtyrët apo më keq akoma e justifikojnë atë, duhet të mendojnë se në cilat shkolla do t’i çojnë fëmijët e tyre nesër. Zgjatja e agonisë së Edi Ramës nuk është shpëtim për ta, por kërcënim për përplasje mes shqiptarëve. Sa më e egër dhuna, aq më i sigurtë është fundi./Lapsi.al
