Autoritetet spanjolle kanë sekuestruar rreth 2,100 kilogramë kokainë në një varkë me vela, rreth 400 milje larg brigjeve të Galicisë. Operacioni, i koduar “Maiden”, ka çuar në arrestimin e katër anëtarëve të ekuipazhit dhe në zbulimin e një rrjeti që siguronte varka për organizatat kriminale në Evropën Lindore dhe Ballkan.
Operacioni u krye nga Shërbimi Spanjoll i Mbikëqyrjes Doganore, përmes anijes “Petrel I”, e cila lokalizoi dhe kontrolloi varkën me vela më 14 shtator. Gjatë kontrollit, agjentët zbuluan 70 pako me kokainë, me peshë totale rreth 2.1 tonë. Në bord u arrestuan edhe katër persona: një shtetas argjentinas, një uruguaian, një kolumbian dhe një shqiptar.
Sipas hetuesve, shqiptari dyshohet se kishte rolin e ndërmjetësit, duke garantuar për organizatat kriminale të Evropës Lindore se transporti i drogës po zhvillohej sipas planit. Hetimi nisi në shkurt, pasi autoritetet morën informacione se një varkë me vela mund të ishte përfshirë në një transport droge në zonën kufitare mes Spanjës dhe Francës. Anija u identifikua në portin e Roses, në provincën e Gironas, dhe u vu nën vëzhgim.
Dyshimet u shtuan në korrik, kur varka u largua nga porti pa sistemin e identifikimit dhe gjurmimit AIS të aktivizuar. Pas humbjes së gjurmëve të saj, autoritetet spanjolle, në bashkëpunim me Agjencinë Kombëtare të Krimit të Mbretërisë së Bashkuar dhe DEA-n amerikane, arritën ta lokalizonin në ujërat e Atlantikut.
Bashkë me sekuestrimin e drogës, agjentët arrestuan në provincën e Gironas edhe një shtetas kilian, i dyshuar për sigurimin e varkave për organizatat kriminale. Hetuesit po kërkojnë gjithashtu një shtetas spanjoll nga Barcelona, i dyshuar për ruajtjen e mjeteve lundruese dhe monitorimin e lëvizjeve të autoriteteve. Sipas hetuesve, grupi kriminal ishte i specializuar në transportimin e drogës me varka me vela dhe ofronte shërbime për organizata të ndryshme kriminale në Evropën Lindore dhe Ballkan.
