Një shtetas suedez i kërkuar me urdhërarrest ndërkombëtar për vepra të rënda penale që lidhen me narkotikët është ekstraduar nga Kosova drejt Suedisë më 21 tetor.
Lajmi është bërë i ditur nga Policia e Kosovës, e cila njoftoi se procedura u realizua nga Drejtoria për Bashkëpunim Ndërkombëtar Policor, në koordinim me njësitet përkatëse të policisë dhe institucionet e drejtësisë.
Personi kërkohej nga autoritetet suedeze, ndërsa ekstradimi u mundësua përmes bashkëpunimit ndërmjet institucioneve të Republikës së Kosovës dhe Mbretërisë së Suedisë.
Policia e Kosovës bëri të ditur se Drejtoria për Bashkëpunim Ndërkombëtar Policor do të vijojë shkëmbimin e informacioneve me institucionet vendore, shtetet partnere dhe organizatat ndërkombëtare.
Ky bashkëpunim synon parandalimin, hetimin dhe zbulimin e veprimtarive kriminale, si dhe identifikimin, gjurmimin dhe arrestimin e personave dhe grupeve kriminale që veprojnë brenda dhe jashtë vendit.