Meta Platforms është urdhëruar të paguajë 25 miliardë dollarë gjobë në një çështje gjyqësore në shtetin amerikan të New Mexico-s, ku kompania u gjet përgjegjëse për mashtrimin e konsumatorëve lidhur me privatësinë e të dhënave dhe mënyrën e funksionimit të platformës Facebook.

Çështja lidhet me pretendimet se miliona përdoruesve u janë mbledhur të dhënat personale pa pëlqimin e tyre, përfshirë rastin e Cambridge Analytica-s, kompanisë britanike të konsulencës politike që u përfshi në fushatën presidenciale të Donald Trumpit në vitin 2016.

Padia ndaj Metës u ngrit në vitin 2021 nga prokurori i përgjithshëm i New Mexico-s, pas zbulimeve se Cambridge Analytica kishte siguruar të dhënat personale të deri në 87 milionë përdoruesve të Facebook-ut përmes një aplikacioni të palës së tretë.

Autoritetet e akuzuan kompaninë se kishte mashtruar përdoruesit për mënyrën se si ruheshin dhe shpërndaheshin të dhënat e tyre, kush mund t’i aksesonte ato dhe si trajtoheshin gjuha e urrejtjes dhe dezinformatat në platformë. Sipas shtetit, Meta e dinte se palët e treta mund të kishin qasje të gjerë në informacionet personale të përdoruesve dhe se kishte toleruar përmbajtje të dëmshme kur kjo i sillte përfitime financiare.

Juria konstatoi më 25 shtator se 26 nga 29 deklaratat e kompanisë dhe drejtuesve të saj lidhur me këto çështje ishin mashtruese. Ajo identifikoi gjithashtu më shumë se 43 milionë shkelje të ligjeve për mbrojtjen e konsumatorëve në New Mexico.

Numri i shkeljeve u përcaktua duke marrë parasysh përdoruesit e Facebook-ut ose banorët e shtetit që kishin qenë audiencë e deklaratave të cilësuara si mashtruese. Ligji i New Mexico-s parashikon gjoba deri në 5 mijë dollarë për çdo shkelje, ndërsa të ardhurat nga gjobat do të kalojnë në sistemin arsimor të shtetit.