E bija e Jakup Krasniqit: Babai refuzon kujdesin e mjekëve në Hagë

E bija e Jakup Krasniqit, Gresë J. Krasniqi, ka njoftuar se babai i saj refuzon kujdesin e mjekëve në Hagë. Sipas saj, gjatë një telefonate, Jakup Krasniqi i ka thënë se i është mohuar çdo e drejtë njerëzore prej gjashtë vitesh dhe se, për këtë arsye, nuk e dëshiron as kujdesin e tyre.

Në një reagim në Facebook, Gresë J. Krasniqi ka treguar se i ati i ka bërë të ditur se nuk do të pranojë më asnjë kujdes nga mjekët.

“Para një muaji, Babi u dënua me 25 vjet burgim.

Sot, gjatë një telefonate, më tha: ‘Erdhën disa doktorë për të më kontrolluar, natyrisht që i refuzova. Jam këtu pa të drejtë, më është mohuar çdo e drejtë njerëzore tash e gjashtë vjet, prandaj nuk më duhet as kujdesi i tyre. Ju të jeni të informuar se unë nuk do të pranoj më asnjë kujdes nga ana e tyre.’

Si bijë, natyrisht që u shqetësova. Babi është në një moshë kur ka nevojë për kujdes të veçantë.

Por, si njeri që i kam kaluar 30 vitet e jetës sime duke e njohur dashurinë dhe lirinë, a mund ta detyroj një njeri tjetër, i cili e ka kaluar gjithë jetën e tij me sakrifica dhe që, me këtë dënim të fundit, pritet të kalojë mbi 35 vjet në burgje, t’i përshtatet një sistemi që i ka sjellë vetëm vuajtje dhe padrejtësi?

Si mund t’i kërkoj të pranojë kujdesin e atyre institucioneve, kur ai ndihet i tradhtuar pikërisht nga drejtësia që duhej ta mbronte?

U ndjeva aq e pafuqishme përballë kësaj fuqie ndërkombëtare kaq të padrejtë.

‘Ne jemi këtu, Babi. Të duam të fortë, të duam të shëndetshëm.’

Kaq pata fuqi t’i them.

Dënimi i Babit nuk është një gabim që pret të korrigjohet. Është një padrejtësi!”, shkroi Gresë J. Krasniqi.