Eurodeputeti austriak Thomas Waitz, bashkëkryetar i Partisë së të Gjelbërve Europianë, ka reaguar lidhur me situatën politike në Shqipëri dhe protestat e zhvilluara në vend.
Në një mesazh që duket se i drejtohet deklaratave të kryeministrit Edi Rama për ndikimin e protestave në procesin e integrimit europian, Waitz thekson se kundërshtimi i korrupsionit dhe kërkesat për institucione funksionale janë në përputhje me vlerat e Bashkimit Europian.
Sipas eurodeputetit, qytetarët që protestojnë për institucione të afta për të luftuar korrupsionin, për arsim më cilësor dhe për mbrojtjen e pasurisë natyrore të vendit, po shprehin kërkesa që përputhen me parimet europiane.
“Protesta për institucione që janë të afta dhe të gatshme të luftojnë korrupsionin është pro-europiane. Protesta për një arsim cilësor është pro-europiane. Dhe protesta për mbrojtjen e trashëgimisë natyrore të Shqipërisë është gjithashtu pro-europiane”, deklaron Waitz.
Reagimi i tij vjen në një kohë kur protestat e studentëve dhe të rinjve në Shqipëri vijojnë, ndërsa përdorimi i forcës nga policia ndaj protestuesve ka nxitur reagime dhe shqetësime edhe në arenën ndërkombëtare.
