Shtetet e Bashkuara kanë zgjeruar masat financiare kundër Iranit, duke vendosur sanksione ndaj një firme ligjore me aktivitet në Greqi dhe Panama, ndërsa kanë nisur verifikimet për lidhjet e mundshme të një banke greke me institucionet financiare iraniane.
Në kuadër të masave të reja, autoritetet amerikane kanë sanksionuar firmën ligjore Karnakis and Karnakis, e dyshuar për mbështetje ndaj aktiviteteve të transportit detar të Iranit.
Paralelisht, Rrjeti i Zbatimit të Krimeve Financiare (FinCEN) ka lëshuar një kërkesë zyrtare për informacion ndaj një banke greke, identiteti i së cilës nuk është bërë publik. Hetimi synon të sqarojë nëse institucioni ka pasur marrëdhënie me rrjete financiare iraniane që preken nga sanksionet amerikane.
Sipas raportimeve të mediave të huaja, kërkesa për informacion nuk është kufizuar vetëm te Greqia. Gjashtë banka të tjera evropiane janë përfshirë gjithashtu në këtë proces, duke u kërkuar të dhëna për marrëdhëniet e tyre të mundshme me institucione financiare iraniane të sanksionuara nga Uashingtoni.
Masat janë pjesë e përpjekjeve amerikane për të kufizuar përdorimin e rrjeteve ndërkombëtare bankare dhe detare nga Irani për transaksione që mund të shkelin sanksionet në fuqi.
Megjithatë, hetimi ndaj bankës greke është ende në fazën e mbledhjes së informacionit. Deri më tani nuk është bërë publik ndonjë përfundim që të konfirmojë shkelje nga ana e saj. Po ashtu, masat e njoftuara nuk kanë sjellë ndërprerje të menjëhershme të transportit fizik të naftës.