Kongresmenia demokrate amerikane Ilhan Omar ka hedhur poshtë akuzat për mashtrim me dokumentet e emigracionit, në intervistën e saj të parë pas kontrollit të banesës nga agjentët federalë më 12 tetor. Ajo e cilësoi operacionin si një përpjekje për ta frikësuar dhe për të kënaqur mbështetësit e presidentit Donald Trump.

Në një intervistë për rrjetin MS Now, përballë gazetarit Chris Hayes, Omar tregoi se rreth 10 deri në 15 agjentë të Homeland Security Investigations mbërritën në banesën e saj në orën 06:00 të mëngjesit dhe trokitën me forcë në derë. Sipas saj, kontrolli zgjati afro pesë orë, gjatë të cilave agjentët kontrolluan dhomat njëra pas tjetrës dhe sekuestruan 17 sende, mes tyre disa telefona.

“Ju nuk shkoni në shtëpinë e dikujt kaq herët në mëngjes, përveçse kur përpiqeni ta tmerroni”, deklaroi kongresmenia, duke vënë në pikëpyetje mënyrën dhe kohën e zhvillimit të operacionit.

Omar beson se bastisja synonte të dërgonte një mesazh politik, pas paralajmërimeve të përsëritura nga figura të administratës amerikane dhe komentatorë të krahut të djathtë se ndaj saj mund të ndërmerreshin masa ligjore.

“Ata vazhdonin të linin të kuptohej se diçka do të më ndodhte”, tha ajo, duke shtuar se, sipas bindjes së saj, autoritetet duhej të demonstronin se kishin ndërmarrë veprime kundër saj, duke thënë: “Shikoni, bastisëm shtëpinë e saj”.

Kontrolli i 12 tetorit shënoi një përshkallëzim të përplasjes disavjeçare mes Omar dhe Trump. Presidenti amerikan e ka sulmuar vazhdimisht kongresmenen për qëndrimet e saj politike, besimin fetar dhe origjinën somaleze.

Të martën, Trump e përshkroi atë si një “person të sëmurë, shumë të pandershëm, që urren vendin tonë”, ndërsa iu përgjigj pyetjeve të gazetarëve në Shtëpinë e Bardhë.

I pyetur nëse Omar mund të përballej me deportimin për shkak të pretendimeve për pasaktësi në dokumentet e emigracionit, Trump u përgjigj: “Epo, mund të ndodhë. Ajo mund të përfundojë edhe në burg”.

Kongresmenia ka mohuar vazhdimisht çdo shkelje. Ajo kundërshtoi gjithashtu pretendimet e përhapura prej vitesh nga qarqe të së djathtës, sipas të cilave ishte përfshirë në një martesë fiktive me vëllain e saj për të manipuluar dokumentet e emigracionit. Sipas Omar, këto pretendime fillimisht u përhapën në një blog somalez dhe më pas u amplifikuan nga përhapës të teorive konspirative në Minneapolis.

Duke folur për mundësinë që kundërshtarët e saj politikë të synojnë largimin e saj nga jeta publike, Omar tha se arrestimi ose deportimi nuk do të ishte domosdoshmërisht rezultati i vetëm që ata do të dëshironin.

“Natyrisht, ata do të donin të më shihnin të burgosur, të deportuar dhe të gjitha këto. Por mendoj se kënaqësia më e madhe për ta do të ishte që unë të thosha: ‘Jam lodhur nga të gjithë ju dhe do të largohem’”, deklaroi ajo.

Më pas, kongresmenia theksoi se nuk ka ndërmend të tërhiqet përballë presionit: “Unë kam të drejtën ligjore të jem anëtare e Kongresit”.
Hetimi federal lidhet me dyshimet për mashtrim të mundshëm në dokumentacionin e emigracionit, por autoritetet nuk kanë bërë publike të gjitha detajet e çështjes. Deri tani, akuzat e përmendura nga Trump dhe përfaqësues të tjerë të administratës nuk përbëjnë prova të një faji të vërtetuar të kongresmenes.