Presidenti i Real Madridit, Florentino Pérez, nuk do të jetë i pranishëm në përballjen ndaj Barcelonës, e planifikuar të dielën e ardhshme në stadiumin Spotify Camp Nou. Gjithashtu, para ndeshjes nuk do të zhvillohet dreka tradicionale mes drejtuesve të dy klubeve.
Sipas gazetës spanjolle Mundo Deportivo, marrëdhëniet institucionale mes dy gjigantëve të futbollit spanjoll vazhdojnë të jenë të ndërprera që prej përfshirjes së Real Madridit në çështjen Negreira. Për këtë arsye, Pérez nuk e ka vizituar Barcelonën në sezonet e fundit.
Kështu, El Clásico i radhës nuk do të sjellë një takim mes dy presidentëve, Joan Laporta dhe Florentino Pérez, pavarësisht rëndësisë së veçantë që pritet të ketë kjo përballje.
Mundo Deportivo kujton se në ndeshjen e sezonit të kaluar në Camp Nou, Pérez ishte përfaqësuesi i vetëm i Real Madridit në tribunën kryesore. Këtë vit, pritet që klubi madrilen të përfaqësohet nga një prej zëvendëspresidentëve të tij.
Ndërkohë, pjesëmarrja e personaliteteve të tjera të njohura mbetet ende e paqartë. I konfirmuar është artisti Tyler, the Creator, marka GOLF e të cilit do të shfaqet në pjesën e përparme të fanellës së Barcelonës.