Lionel Scaloni pritet të vazhdojë aventurën në krye të kombëtares së Argjentinës deri në përfundim të Kupës së Botës 2030. Trajneri 48-vjeçar ka arritur marrëveshjen me Shoqatën Argjentinase të Futbollit për rinovimin e kontratës, duke i dhënë fund pasigurive rreth së ardhmes së tij.
Scaloni mori drejtimin e “Albiceleste”-s në vitin 2018 dhe që atëherë ka udhëhequr një nga periudhat më të suksesshme të historisë së futbollit argjentinas.
Nën drejtimin e tij, Argjentina fitoi Kupën e Amerikës në vitet 2021 dhe 2024, Finalissima-n në vitin 2022 dhe Kupën e Botës në Katar, duke ndërprerë një pritje 36-vjeçare për trofeun më të rëndësishëm të futbollit.
Vazhdimësia e trajnerit ishte vënë në pikëpyetje gjatë javëve të fundit, ndërsa edhe e ardhmja e Lionel Messit në kombëtare kishte ngritur diskutime për drejtimin e skuadrës në vitet e ardhshme.
Marrëveshja e re i jep Scalonit mundësinë të planifikojë ciklin e ardhshëm dhe të përgatisë Argjentinën për Botërorin e vitit 2030, me synimin për të ruajtur statusin mes kombëtareve më të forta në botë.
Bilanci i tij në stol është mbresëlënës: 81 fitore, 14 barazime dhe 10 humbje në 105 ndeshje.