Sipas sondazheve, 40 për qind e votuesve me origjinë nga Ballkani mbështesin Partinë Popullore Zvicerane (SVP). Ndërsa kryetari i partisë, Marcel Dettling, këtë mbështetje e lidh me punën e partisë dhe shqetësimet për krimin, politologu Michael Hermann sheh si arsye kryesore kulturën konservatore dhe përvojat historike nga vendet e origjinës.
Sipas sondazheve të fundit, Partia Popullore Zvicerane (SVP) mund të arrijë një rezultat rekord në zgjedhjet federale të vitit të ardhshëm. Në këtë mbështetje kontribuojnë edhe votuesit nga Evropa Juglindore. Kurrë më parë kaq shumë zviceranë me rrënjë ballkanike nuk e kanë mbështetur partinë e krahut të djathtë, raporton Aargauer Zeitung, duke iu referuar barometrit zgjedhor të transmetuesit publik zviceran SRG.
Sipas të dhënave të publikuara, 40 për qind e votuesve me origjinë nga Ballkani mbështesin SVP-në. Kjo përqindje është më e lartë se ajo e votuesve pa sfond migrimi, ku mbështetja për partinë arrin në 31 për qind, si dhe e burrave të moshës 50 deri në 64 vjeç, ku kjo shifër është 37 për qind, shkruan 20 minuten.
Dettling: Zviceranët me rrënjë ballkanike votojnë për SVP-në për shkak të krimit
Për presidentin e SVP-së, Marcel Dettling, arsyet e kësaj mbështetjeje janë të qarta. Ai thotë se partia e tij ka marrë gjithmonë mbështetje nga emigrantët e integruar mirë.
“Shumë nga votuesit tanë me rrënjë në Ballkan erdhën këtu për të punuar”, tha Dettling.
Sipas tij, këta votues tani duhet të shohin se si shteti përdor paratë e mbledhura nga taksat për të mbështetur njerëzit që, siç shprehet ai, “nuk punojnë dhe, në një masë të madhe, i drejtohen edhe krimit”, transmeton Telegrafi.
Dettling shton se shumë prej tyre e kanë përjetuar nga afër se çfarë ndodh kur shteti kufizon lirinë. Si shembull, ai përmend çmimet e benzinës.
Në këtë pikë, Dettling dhe politologu Michael Hermann pajtohen se çështja e lirisë dhe rëndësia e veturës kanë ndikim te një pjesë e këtij grupi votuesish.
Hermann: Arsyet lidhen me kulturën dhe përvojat nga vendet e origjinës
Megjithatë, politologu Michael Hermann i sheh arsyet e mbështetjes së lartë për SVP-në mes zviceranëve me rrënjë ballkanike ndryshe nga kreu i partisë.
Sipas tij, faktorët kryesorë lidhen më shumë me kulturën dhe përvojat e njerëzve nga vendet e tyre të origjinës.
Sa u përket çmimeve të benzinës, Hermann pajtohet me Dettling se vetura ka një rëndësi të veçantë për këtë grup të popullsisë, pasi ajo shihet edhe si simbol statusi.
Megjithatë, politologu vlerëson se argumenti i krimit nuk ka shumë bazë për të shpjeguar këtë prirje politike.
“Nëse do të ishte kështu, migrantët e integruar mirë nga të gjitha rajonet do të duhej të ishin të prirur të mbështesnin SVP-në”, argumenton Hermann.
Ai përmend si shembull votuesit me origjinë portugeze, të cilët, sipas tij, votojnë dukshëm më shpesh për partitë e krahut të majtë.
Ballkani konservator dhe SVP-ja
Sipas Hermann, popullariteti i SVP-së në mesin e zviceranëve me rrënjë ballkanike lidhet edhe me natyrën patriarkale dhe konservatore të shoqërive nga të cilat vijnë ata.
Një tjetër faktor, sipas politologut, janë përvojat historike me socializmin në ish-Jugosllavi. Ai argumenton se përvojat nga periudha e socializmit real ekzistues vazhdojnë të ndikojnë në qëndrimet politike të një pjese të këtij grupi dhe kontribuojnë në qëndrimin kritik ndaj partive të krahut të majtë.
Kështu, ndërsa Marcel Dettling e lidh mbështetjen e votuesve me rrënjë ballkanike për SVP-në me integrimin në tregun e punës, shqetësimet për krimin dhe lirinë individuale, Michael Hermann thekson ndikimin e kulturës konservatore dhe përvojave historike nga vendet e origjinës./Telegrafi/
