Pas dhunës dhe trazirave të regjistruara në prag të protestave kundër rritjes së kostos së jetesës, qeveria franceze po përgatit një plan të jashtëzakonshëm sigurie për të garantuar rendin publik gjatë manifestimeve të së shtunës. Plani mbrojtës parashikon zbarkimin e forcave të përforcuara të rendit, të cilat do të mbështeten drejtpërdrejt nga njësitë më të specializuara të vendit.
Zëvendësministri i Brendshëm, Jean-Didier Berger, bëri të ditur gjatë një interviste për Sud Radio se shteti po vë në dispozicion të gjithë kapacitetin e tij operativ. “Qëllimi është të mobilizojmë të gjitha forcat tona”, deklaroi Berger, duke garantuar se autoritetet po marrin të gjitha masat që protestat në të gjithë territorin francez “të shkojnë sa më mirë të jetë e mundur”.
Struktura e planit operativ përfshin mbrojtjen e objekteve strategjike dhe ndërhyrjen e shpejtë në pikat më kritike. Ushtarakët e trupave “Sentinelle” do të stacionohen në pika fikse si ambasadat dhe ndërtesat qeveritare. Ndërkohë, repartet speciale RAID, GIGN dhe BRI “do të ndërhyjnë në mbështetje, në terren për të menaxhuar situatat më delikate”, ndërsa në bashkitë ku ka mundësi teknike, në ruajtjen e rendit do të kontribuojë edhe policia bashkiake.
Përforcimi i forcave të sigurisë vjen si reagim i drejtpërdrejtë ndaj përshkallëzimit të manifestimeve të mëparshme. I pyetur nga rrjeti BFMTV, Berger konfirmoi se niveli i mobilizimit të policisë për këtë valë të dytë protestash do të jetë “20% më i lartë se javën e kaluar”. Mbulimi në terren do të mbështetet gjithashtu nga helikopterët e vëzhgimit ajror dhe automjetet e blinduara për goditjen e trazirave.
Ndërsa Parisi përgatitet për protesta nën masa të rrepta, në qytetet e tjera kryesore po aplikohen kufizime të prerë. Pas episodeve të dhunës dhe plaçkitjeve të regjistruara në periferi gjatë manifestimeve të 17 tetorit, Prefektura e Lyonit vendosi ndalimin e plotë të çdo tubimi publik për të shtunën e 24 tetorit. Përmes një komunikate zyrtare, autoritetet vendore deklaruan se “si pjesë e thirrjes që qarkullon për demonstrata dhe duke pasur parasysh ngjarjet e 17 tetorit, prefekti ka marrë vendimin për të ndaluar me dekret çdo demonstratë në qytetin e Lyonit”.
The post Franca nxjerr njësitë elitare në rrugë appeared first on Euronews Albania.
Burimi: Botë
