Gjykata e Tiranës ka urdhëruar lirimin e 22 personave të arrestuar gjatë protestave të shoqëruara me tensione në kryeqytet. Për 17 prej tyre, gjykata e ka cilësuar të paligjshëm arrestimin në flagrancë dhe ka vendosur të mos caktojë masa sigurie.
Për pesë protestuesit e tjerë, arrestimi është vlerësuar i ligjshëm, por ndaj tyre është caktuar masa e sigurimit personal “Detyrimi për t’u paraqitur në Policinë Gjyqësore”.
Gjykata e Shkallës së Parë të Juridiksionit të Përgjithshëm Tiranë shqyrtoi kërkesat e Prokurorisë për personat e ndaluar, të dyshuar për vepra penale që lidhen me organizimin dhe pjesëmarrjen në grumbullime e manifestime të paligjshme, kundërshtimin e punonjësve të policisë së rendit publik dhe, në disa raste, shkatërrimin e pronës.
Në disa prej vendimeve, gjykata konstatoi se arrestimet në flagrancë nuk ishin të ligjshme, rrëzoi kërkesat për caktimin e masave të sigurisë dhe urdhëroi lirimin e menjëhershëm të personave të ndaluar, nëse nuk mbahen për ndonjë shkak tjetër ligjor.
Ndërkohë, për protestuesit ndaj të cilëve u caktua detyrimi për t’u paraqitur në Policinë Gjyqësore, gjykata përcaktoi edhe afatet e paraqitjes. Disa prej tyre duhet të paraqiten pranë Prokurorisë së Tiranës të hënën e parë dhe të tretë të çdo muaji, në orën 10:00, ndërsa për të tjerë është caktuar paraqitja të hënën e tretë të çdo muaji, në të njëjtën orë, pranë oficerit të Policisë Gjyqësore të seksionit përkatës.
Në një prej rasteve, gjykata e vlerësoi arrestimin të paligjshëm, por caktoi gjithsesi masën e detyrimit për t’u paraqitur në Policinë Gjyqësore. Për një tjetër person, të dyshuar për kundërshtim të punonjësit të policisë së rendit publik, u vendos lirimi pa caktimin e një mase sigurie.
Vendimet vijnë pas arrestimeve të kryera gjatë tubimeve në Tiranë, të cilat u shoqëruan me tensione mes protestuesve dhe Policisë së Shtetit.