Kongresmeni amerikan Mike Lawler ka reaguar për protestat kundër qeverisë në Shqipëri, duke kërkuar nga autoritetet shqiptare uljen e menjëhershme të tensioneve dhe ndalimin e përdorimit të forcës ndaj protestuesve paqësorë.
Në një postim në platformën X, përfaqësuesi republikan i distriktit të 17-të të Nju Jorkut thotë se ka marrë mesazhe shqetësimi nga qytetarë shqiptaro-amerikanë që jetojnë në zonën e tij elektorale. Sipas tij, ata janë të alarmuar për situatën në Shqipëri dhe pasojat që zhvillimet e fundit mund të kenë për të ardhmen e demokracisë në vend.
Lawler shprehet se solidarizohet si me zgjedhësit e tij shqiptaro-amerikanë, ashtu edhe me popullin shqiptar, duke theksuar se e drejta për të protestuar dhe për të shprehur lirisht mendimet duhet të garantohet nga çdo qeveri demokratike.
Ai vë në dukje se ky detyrim është veçanërisht i rëndësishëm për vendet anëtare të NATO-s, të cilat duhet të respektojnë të drejtat dhe liritë e qytetarëve të tyre.
“Çdo qeveri, veçanërisht demokracitë dhe aleatët e NATO-s, duhet të respektojë të drejtën e qytetarëve për të protestuar paqësisht dhe për të shprehur pikëpamjet e tyre”, shkruan kongresmeni amerikan, duke i kërkuar qeverisë shqiptare të veprojë menjëherë për të qetësuar situatën dhe për t’i dhënë fund përdorimit të forcës ndaj protestuesve paqësorë.
I have heard from my Albanian-American constituents in the NY-17 who are deeply concerned about the ongoing protests in Albania and what this means for the future of democracy in the country. I stand with my constituents and with the Albanian people.
Every government, especially democracies and NATO allies must respect the right of its people to peacefully protest and express their views. I urge the Albanian government to immediately de-escalate tensions and end the use of force against peaceful protesters.
— Congressman Mike Lawler (@RepMikeLawler) October 22, 2026
