Revista prestigjioze britanike “The Economist” i ka kushtuar një analizë protestave në Shqipëri, duke theksuar se ato kanë një sfond të ndryshëm nga demonstratat në vendet e tjera evropiane.
Sipas revistës, protestat kundër qeverisë së Edi Ramës nisën më 31 maj dhe për muaj të tërë vijuan në mënyrë paqësore, të nxitura fillimisht nga planet për ndërtimin e një resorti bregdetar në një zonë të mbrojtur natyrore, projekt i lidhur me Jared Kushner.
Më pas, që prej 13 tetorit, një pjesë e lëvizjes është përfshirë në akte dhune, me sulme ndaj institucioneve, bankave dhe bizneseve.
Sipas “The Economist”, pakënaqësia e protestuesve shkon përtej çështjes së resortit dhe lidhet edhe me korrupsionin dhe gjendjen ekonomike të vendit.
Revista shkruan se ndonëse Shqipëria ka shënuar përparim ekonomik, ajo mbetet ndër vendet më të varfra të Evropës. Duke iu referuar reagimit të kryeministrit Rama dhe qëndrimit të protestuesve, analiza ngre pikëpyetje mbi pasojat politike të përshkallëzimit të situatës.
“Demonstratat më të dhunshme jashtë Francës dhe Italisë po zhvillohen në Shqipëri dhe kanë një sfond të ndryshëm. Shqiptarët kanë protestuar kundër qeverisë së Edi Ramës, kryeministrit, që nga 31 maji.
Për muaj të tërë, demonstratat ishin paqësore; të nxitura nga një plan i Jared Kushner, dhëndrit të Donald Trump, për të ndërtuar një resort bregdetar në një rezervat natyror, ato u quajtën Revolucioni i Flamingove. Por që nga 13 tetori, një krah i dhunshëm i lëvizjes ka sulmuar ministri, gjykata, banka dhe dyqane.
Protestat e Flamingove kanë qenë gjithmonë për më shumë sesa thjesht zhvillimin e resorteve. Pavarësisht përparimit ekonomik në vitet e fundit, Shqipëria është një nga vendet më të varfra në Evropë dhe nivelet e korrupsionit janë të larta.
Zoti Rama pretendon se trazirat nxiten nga Rusia dhe Irani. Ai refuzon të japë dorëheqjen dhe premton shpërblime të mëdha për policinë, në mënyrë që të rimarrë kontrollin e rrugëve. Një akademik, i cili kërkoi të mbetej anonim nga frika e hakmarrjes, tha se bindja e protestuesve se mund ta detyronin kryeministrin të largohej kishte qenë e gabuar, por se reagimi i tij i ashpër ia kishte shkatërruar legjitimitetin: “Nuk mendoj se ka më kthim pas nga kjo.
Trazirat në Shqipëri, Francë, Itali dhe gjetkë kanë një gjë të përbashkët. Qytetarët po kërkojnë gjëra që qeveritë, qoftë për shkak të korrupsionit apo të realitetit fiskal, nuk mund t’i ofrojnë,” thekson revista.
