Serena Williams: Lidershipi nuk është vetëm të arrish në majë, por çfarë ndryshon kur je atje

“Nuk kemi vërtet nevojë për një burrë që të na shpëtojë; e di që unë nuk kam”, deklaroi legjenda e tenisit, Serena Williams, përpara pjesëmarrëseve në konferencën e organizuar nga Forbes në Nju Jork.

Takimi mblodhi drejtuese nga biznesi, financa, teknologjia, sporti dhe industria e argëtimit, me një temë qendrore: çfarë ndodh kur gratë marrin kontrollin mbi pushtetin dhe vendimmarrjen.

Kur Moira Forbes, nënpresidente ekzekutive e Forbes, organizoi për herë të parë konferencën 14 vite më parë, fjala “pushtet” ishte ende e diskutueshme kur përdorej për gratë. Ndikimi konsiderohej i pranueshëm, por jo domosdoshmërisht pushteti.

Sot, situata ka ndryshuar. Sipas Forbes, 100 gratë në listën e më të fuqishmeve në botë për vitin 2025 kontrollojnë së bashku një fuqi ekonomike prej 37 trilionë dollarësh dhe ndikojnë në jetën e më shumë se një miliard njerëzve.

Megjithatë, pabarazitë mbeten të dukshme.

Serena Williams: Ndryshimi fillon nga financimi

Pas karrierës në tenis, Serena Williams u përqendrua te investimet në sipërmarrje përmes fondit Serena Ventures. Ajo u befasua kur zbuloi se vetëm rreth 2% e financimeve nga kapitali sipërmarrës shkonin për gratë.

“Mendova se ishte një gabim leximi, shkrimi apo citimi”, tregoi ajo.

Për Williams, zgjidhja nuk qëndron vetëm te mbështetja e sipërmarrëseve, por edhe te ndryshimi i atyre që vendosin se ku shkojnë paratë.

“Ideja ime është të ndryshoj pjesën e sipërme të procesit të përzgjedhjes”, tha ajo, duke iu referuar nevojës për të ndryshuar mënyrën se si identifikohen dhe financohen bizneset.

Përmes Serena Ventures, ajo ka investuar në më shumë se 100 kompani, shumë prej të cilave drejtohen nga gra ose zhvillojnë produkte dhe shërbime për to.

Drejtuesit duhet të shohin përpara, jo pas

Një tjetër mesazh erdhi nga Gunjan Kedia, CEO e U.S. Bancorp, një prej bankave më të mëdha tregtare amerikane, me mbi 600 miliardë dollarë aktive.

Kedia, e renditur e 23-ta në listën e grave më të fuqishme të Forbes, theksoi se lidershipi kërkon gatishmërinë për të sfiduar praktikat tradicionale.

“Zgjedhja e një drejtuesi është të shohë përmes xhamit të përparmë, jo pasqyrës së pasme”, u shpreh ajo.

Këshilla e saj për drejtuesit ishte të mos i trajtojnë praktikat që i kanë sjellë sukses në të kaluarën si të vetmen rrugë për të ardhmen.

“Mos lejoni kurrë që tradita juaj e së kaluarës të kthehet në burg”.

Historia personale e Kedias e përforcon këtë mesazh. Puna e saj e parë ishte shitja derë më derë e aromatizuesve të ajrit në Delhi. Sot, ajo është gruaja e parë që drejton U.S. Bancorp.

Fuqia e lidershipit është edhe aftësia për të zgjedhur

Gjatë konferencës u theksua se suksesi nuk duhet matur vetëm me arritjen e majës, por edhe me lirinë për të përcaktuar objektivat personale.

Patinatorja olimpike Alysa Liu, 21 vjeçe, u tërhoq përkohësisht nga sporti në vitin 2022, pasi kuptoi se nuk po garonte për veten. Ajo u rikthye në vitin 2024 dhe fitoi medaljen e artë olimpike në vitin 2026, këtë herë sipas kushteve të saj.

Një dimension tjetër i fuqisë personale u soll nga Ali Truwit, e cila, pasi i mbijetoi një sulmi peshkaqeni dhe humbi një këmbë, u rikthye në ujë dhe fitoi dy medalje argjendi në Lojërat Paralimpike të Parisit.

Ndërsa ekspertja e financave Vivian Tu, e njohur si YourRichBFF, e përqendroi mesazhin te edukimi financiar.

“Paraja është një mjet, një burim, një aftësi, një muskul”, tha ajo, duke theksuar se njohuritë financiare krijojnë liri dhe mundësi zgjedhjeje.

Mesazhi i përbashkët i konferencës ishte se lidershipi nuk përfundon me marrjen e pushtetit. Vlera e tij qëndron te mënyra se si përdoret për të ndryshuar organizatat, për të krijuar mundësi dhe për të sfiduar kufizimet ekzistuese. / Forbes