Aktori i njohur i Hollywood-it, Tom Cruise, do të nderohet me çmimin prestigjioz për arritje jetësore nga Instituti Amerikan i Filmit (AFI), në vlerësim të karrierës së tij të gjatë dhe kontributit në industrinë e kinematografisë.
Instituti njoftoi se aktori do të marrë çmimin e 52-të AFI Life Achievement Award gjatë një ceremonie gala që do të mbahet më 24 prill 2027, në Teatrin Dolby në Los Angeles.
Tom Cruise është një ikonë globale
-deklaroi Kathleen Kennedy, kryetare e bordit të AFI-së, duke vlerësuar përkushtimin e tij të jashtëzakonshëm si aktor dhe producent, si dhe besimin e tij në fuqinë e kinemasë për të bashkuar njerëzit.
Cruise, 64 vjeç, ka ndërtuar një karrierë që shtrihet në më shumë se katër dekada, duke u bërë një prej yjeve më të njohur të kinemasë botërore.
Ai ka luajtur në filma të suksesshëm si “Top Gun”, “Jerry Maguire”, “Rain Man”, “A Few Good Men” dhe serinë e famshme “Mission: Impossible”, ku njihet edhe për realizimin e shumë skenave të rrezikshme pa përdorur dublues.
Përgjatë karrierës, aktori është nominuar tri herë për çmimin Oscar në kategoritë e aktrimit, për interpretimet në filmat “Born on the Fourth of July,” “Jerry Maguire” dhe “Magnolia”. Ai mori gjithashtu një nominim si producent, pasi “Top Gun: Maverick” u nominua për filmin më të mirë.
Në vitin 2025, Cruise u nderua edhe me një Oscar nderi gjatë ceremonisë së çmimeve të Akademisë së Arteve dhe Shkencave të Filmit.
Çmimi AFI Life Achievement Award u krijua në vitin 1973 dhe konsiderohet një prej vlerësimeve më të rëndësishme për karrierën në film. Ai u jepet artistëve, puna e të cilëve ka ndikuar ndjeshëm në zhvillimin e artit kinematografik dhe ka lënë gjurmë të qëndrueshme në kulturë.
Me këtë vlerësim, Cruise do t’i bashkohet një liste emrash të shquar të kinemasë, mes tyre Meryl Streep, Steven Spielberg, Morgan Freeman, Denzel Washington dhe Nicole Kidman. Fituesi i vitit 2026 ishte aktori dhe komediani Eddie Murphy.
Ceremonia në nder të Cruise pritet të mbledhë emra të njohur të industrisë së filmit, ndërsa të ardhurat nga eventi do të mbështesin programet edukative dhe artistike të Institutit Amerikan të Filmit.
