Bournemouth ka marrë një fitore spektakolare 3-0 ndaj Milanit në UEFA Europa League, në një mbrëmje që kuqezinjtë do të dëshironin ta harronin sa më shpejt.

Protagonisti negativ i takimit ishte portieri Mike Maignan, gabimi i të cilit u kthye në një nga momentet më të komentuara të ndeshjes.

Bournemouth kaloi në avantazh pas një penalltie të fituar për prekje të topit me dorë nga Koni De Winter, ndërsa Justin Kluivert u tregua i saktë nga pika e bardhë.

Goli i dytë erdhi sërish nga 11-metërshi, pas një ndërhyrjeje të gabuar të Maignan, i cili goditi me pëllëmbë në fytyrë Tyler Adams brenda zonës.

Këtë herë, Marcus Tavernier mori përsipër ekzekutimin dhe dërgoi topin në rrjetë, duke e vënë Milanin në një situatë edhe më të vështirë.

Bournemouth dominoi pjesën e parë, duke treguar ritëm, agresivitet dhe një lojë kolektive që vuri në vështirësi të mëdha skuadrën italiane.

Në pjesën e dytë, anglezët administruan avantazhin, ndërsa Milani vuajti edhe për shkak të inferioritetit numerik.

Kuqezinjtë patën pak mundësi për të reaguar, por nuk arritën të gjenin rrugën e rrjetës.

Golin e fundit të mbrëmjes e shënoi Amine Adli, me një goditje të shkëlqyer dënimi nga rreth 25 metra, duke vulosur shifrat në 3-0.

Kjo fitore ka rëndësi historike për Bournemouth, që u bë skuadra e parë angleze në më shumë se 50 vjet që fiton tri ndeshjet e para në kompeticionet madhore europiane.

Ndërkohë, Milani largohet me një humbje të rëndë, ku gabimi i Maignan dhe mungesa e reagimit të skuadrës lanë një shije të hidhur.

Një mbrëmje për t'u mbajtur mend për Bournemouth, por për t'u harruar sa më shpejt nga Milani!

GOLAT E NDESHJES: VIDEO + VIDEO