Kryeministri Edi Rama ka përsëritur ftesën për dialog, duke deklaruar se është i gatshëm të takohet në çdo vend dhe në çdo orë me këdo që beson se Shqipëria mund të bëhet më e mirë përmes shkëmbimit të pikëpamjeve dhe bashkëjetesës demokratike.
Në një mesazh të tij, Rama ka komentuar protestat e zhvilluara në Tiranë, duke dënuar atë që e cilëson si kundërshti të dhunshme dhe duke paralajmëruar pasoja ligjore dhe penale për personat që, sipas tij, kanë kryer shkelje gjatë tubimeve.
“Përsëri e përsëri, e përsëri ftesa për dialog dhe gatishmëria për të qenë me këdoqoftë që kërkon dhe beson në dialog është këtu. Jam i gatshëm kudoqoftë, në çdo vend, në çdo orë, me ata që besojnë se Shqipëria duhet bërë më e mirë dhe se Shqipëria bëhet më e mirë me njerëzillëk, me shkëmbim dhe ballafaqim pikëpamjesh sado të kundërta”, shprehet Rama.
Kryeministri ka akuzuar organizatorët e protestave se kanë përdorur dhunën dhe ka pretenduar se disa persona kanë vepruar në emër të studentëve, duke iu referuar edhe lëvizjes Antifa.
“Kush e mori peng kryeqytetin duke eksportuar këtu terrorin e ANTIFA-s dhe duke bërë këtu lojën e të tjerëve në emër të studentëve e duke u vënë në ballë të studentëve përmes fytyrës së mbuluar, duhet ta dijë se do të përgjigjet”, deklaron Rama.
Ai ka theksuar se përgjegjësia, sipas tij, do të përcaktohet në bazë të shkallës së shkeljeve të kryera.
“Do të përgjigjet ligjërisht, do të përgjigjet penalisht, do të përgjigjet sipas shkallës së shkeljes së bërë”, vijon kryeministri.
Rama ka argumentuar se dhuna nuk mund t’u imponohet qytetarëve dhe familjeve që duan të vijojnë jetën e tyre të përditshme, ndërsa ka paralajmëruar se ajo që e cilëson si një “keqkuptim të madh” do të shërbejë si mësim për ata që, sipas tij, synojnë të ndryshojnë drejtimin e vendit përmes protestave.
Në përfundim, kreu i qeverisë ka deklaruar se rruga e Shqipërisë drejt integrimit evropian nuk do të ndryshojë.
“Shqipëria do të vazhdojë drejtë dhe Shqipëria do të çojë atje në majën e ëndërruar flamurin e Ismail Qemalit dhe Skënderbeut dhe Shqipëria do të jetë pjesë e atij Bashkimi Europian që nuk e pengojnë dot forcat që janë përfshirë në këtë zullum të madh”, përfundon Rama.a.b
