Kryeministri Edi Rama ka dalë sot në një konferencë për mediat, ku në fokus kanë qenë protestat masive të zhvilluara në vend, me të rinjtë shqiptarë që kërkojnë dorëheqjen e tij.
Gjatë deklaratës së tij, Rama i doli në mbrojtje Policisë së Shtetit, duke pretenduar se punonjësit e policisë kanë pësuar më shumë dëmtime gjatë përplasjeve me protestuesit.
Kryeministri përdori gjithashtu një gjuhë të ashpër ndaj mediave, duke paralajmëruar se do të ketë një moment të dytë për të folur për ato që i cilësoi si “ekrane të korruptuara”.
Një tjetër pretendim i përsëritur nga Rama ishte ai për përfshirjen e forcave të huaja në organizimin e protestave.
Ai deklaroi se përshkallëzimi i situatës ishte përgatitur prej muajsh, por në deklaratën e tij nuk përmendi emra konkretë apo paraqiti publikisht prova që të mbështesnin këto akuza.
“Një krim që u relativizua dhe u glorifikua në ekranet e mbrëmjeve mediatike. Shqipëria dhe shqiptarët u mbingarkuan me idenë e rreme se studentët, të pafajshëm, idealistë, të dalë në rrugë, u vunë nën dhunën policore. Një përmbysje dramatike, manipuluese e një realiteti tërësisht tjetër.
Kam ndarë me ju raportet e policëve të plagosur dhe protestuesve të lënduar, në Tiranë, në Europë e në Shqipëri. Në vendet ku ka ndodhur diçka e ngjashme, ku faktikisht ka pasur dy punonjës policie të plagosur për një protestues apo kalimtar të lënduar, dhe në gjithë vendet e tjera, raporti është ndryshe.
E përsëris, për ekranet e korruptuara do të ketë një kohë të dytë për të folur.
Sot jam këtu për të folur dhe ekspozuar një komponent që e kam komentuar mes shumë përqeshjeve dhe mes shumë ofendimeve të kthyera drejt meje, si një koment fyes për studentët.
Qysh se nisi protesta paqësore masive e flakadanëve, kam thënë se arsyet për të protestuar janë legjitime dhe mund të jenë të pafundme, por qysh në krye të herës ka qenë një fakt që, në këtë valë të dytë dhe të dhunshme, është evidentuar në të gjithë përmasën e vet.
Përshkallëzimi është përgatitur për disa muaj. Të dhënat e futjes së maskave dhe eksplozivëve përmes doganës janë në duart e Policisë së Shtetit. Të dhënat e organizimit të grupeve si pjesë e rolit Antifa…”, tha Rama.
