Rama publikoi fotot e personave me precedentë penal në protestë, i përgjigjet protestuesi: Jam student i mjekësisë me mesatare 10! Këto janë legjenda me mbret (VIDEO)

Pas publikimit nga ana e kryeministrit Rama të fotografive dhe iniciale të personave të përfshirë në protestë dhe me precedentë të pretenduar kriminal, kanë filluar reagimet e parë.

Një i ri 20-vjeçar, Jon Sinoimeri, student i mjekësisë me mesatare 10, i prezantuar si një i ri, jo student, me precedentë penal në fushën e narkotikëve, reagoi publikisht për të përgënjeshtruar kryeminsitrin.

“Zoti kryeministër ka dalë sot dhe më akuzuar për veprën penale prodhim dhe shitje të lëndëve narkotike. Unë jam student i Mjekësisë dhe ky shpik legjenda me mbret. Dua të tregoj të gjitha notat që kam marrë me mesatare 10.0. Nuk na ndaloni dot me këto gënjeshtra. Këto janë përpjekjet e fundit të një diktatori. Kam qenë të martën e kaluar i shoqëruar. Më mbajtën 7 orë e gjysmë dhe pastaj më lëshuan. Nuk e di ta do ta denoncoj, se nuk kam kohë për denoncime të kota. Nuk kam besim te asgjë. Godinat ku bëjmë mësim janë mizerable. Profesorët tanë nuk janë të një punësuar, por pesë të punësuar. Gjysmat e tyre nuk i njohim. Duam vetëm dorëheqje të Ramës dhe opozitës, nuk duam dialog ", tha Jon Sinoimeri.

LEXO EDHE:
Protestat në Shqipëri/ 12 eurodeputetë kërkojnë sqarime nga Kaja Kallas! Edhe Beleri mes aleatëve të PD

Në të vërtetë, i riu rezulton të jetë referuar në prokurori nga policia, vitin e kaluar, pasi iu gjet 1.4 gram kanabis sativa. Por prokuroria nuk filloi asnjë çështje ndaj tij.

Një tjetër person i përfshirë në listën e  Ramës është dhe Ergys Llanaj, të cilët iu permendën si precedent prishja e qetësisë publike, dhe kundërshtimi i punonjësit të policisë, shoqëruar me dyshimet për marrjen e financimeve nga Irani.

Llanaj rezulton të jetë anëtar kryesie në partinë “Shqipëria bëhet”. Ndaj akuzave të Ramës reagoi kreu i kësaj partie Adriatik Lapaj.

“Më 4 janar 2026, Llanaj u arrestua së bashku me tre drejtues të tjerë të Lëvizjes “Shqipëria Bëhet”, gjatë protestës përpara Kryeministrisë. Gjykata i vlerësoi arrestimet si të paligjshme dhe më datë 28 shtator 2026, u vendos pushimi i procedimit penal, me arsyetimin se fakti penal nuk ekzistonte. Në vend që të kërkojë falje për veprimet e policisë së tij, Kryeministri zgjedh të hedhë akuza të reja. Llanaj ka shërbyer për 18 vite në ushtrinë shqiptare, ka tre mastera shkencorë, gradën doktor dhe titullin avokat", thotë Adriatik Lapaj.

Në përfundim të reagimit, Lapaj thekson se Lëvizja “Shqipëria Bëhet” do të vijojë protestat dhe kundërshtimin ndaj qeverisë, duke deklaruar se nuk do të tërhiqet përballë arrestimeve dhe asaj që e cilëson si përpjekje për intimidim të protestuesve.

 

Xh.K/E.H/Shqiptarja.com

TAG:
• Ergys Llanaj
• protestat kunder qeverise
• Jon Sinoimeri
• Tirane