Buxheti arkëton 627 miliardë lekë për janar-shtator

Ministria e Financave ka publikuar të dhënat për performancën paraprake të treguesve fiskalë të konsoliduar për periudhën Janar-Gusht, që reflekton ecurinë e mbledhjes së të ardhurave dhe realizimit të shpenzimeve.

Të ardhurat totale, për periudhën Janar-Shtator 2026, arritën në rreth 626.6 miliardë lekë, një realizim në masën 100.3% të planit të periudhës.

Shpenzimet e përgjithshme publike, për periudhën Janar-Gusht 2026, arritën në rreth 556.3 miliardë lekë, me një realizim në masën 92.8% të planit të periudhës.

Performanca Paraprake e të Ardhurave dhe Shpenzimeve për Janar-Shtator 2026:

Të ardhurat totale, krahasuar me të njëjtën periudhë të një viti më parë, u rritën me rreth 63.7 miliardë lekë ose 11.3 % më shumë, një realizim në masën 76.1% të planit vjetor të mbledhjes së të ardhurave.

Të ardhurat e arkëtuara nga Tatimet dhe Doganat, për periudhën Janar-Shtator 2026, janë në shumën 401.9 miliardë lekë, 677 milionë lekë ose 0.2% më shumë se plani për periudhën 9-mujore 2026. Krahasuar me të njëjtën periudhë të një viti më parë janë mbledhur 29.6 miliardë lekë ose 7.9% më shumë.

Të ardhurat tatimore të mbledhura nga administrata tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionale), për periudhën  Janar-Shtator 2026, u realizuan në shumën 215.6 miliardë lekë, 21.9 miliardë lekë ose 11.3% më shumë se 9-mujori i vitit 2025. Krahasuar me planin e periudhës 9-mujore, të ardhurat e mbledhura janë 3.7 miliardë lekë ose 1.8% më shumë.

Të ardhurat nga TVSH e arkëtuar (neto) u realizuan në shumën 65 miliardë lekë, 14.6 miliardë lekë ose 29% më shumë se 9-mujori 2025 dhe me realizim në shumën prej +5.9 miliardë lekë ose 110% të planit për 9-mujorin e vitit 2026. Rimbursimet e dhëna për periudhën Janar-Shtator 2026 janë në shumën 11.3 miliardë lekë.

Të ardhurat e mbledhura nga tatimi mbi fitimin u realizuan në shumën 42.3 miliardë lekë ose 95.7% e planit për 9-mujorin 2026.

Të ardhurat nga tatimi mbi të ardhurat personale, për periudhën Janar-Shtator 2026, janë në shumën 73 miliardë lekë, 9.8 miliardë lekë ose 15.5% më shumë se 9-mujori i vitit 2025.

Të ardhurat nga taksat nacionale, për periudhën Janar-Shtator 2026, u realizuan në shumën 35.2 miliardë lekë, 415 milionë lekë ose 1.2% më shumë se 9-mujori i vitit 2025, si dhe me realizimin në shumën 229 milionë lekë ose 100.7% të planit për 9-mujorin 2026.

Të ardhurat nga Fondet Speciale, që përfshijnë të ardhurat nga sigurimet shoqërore dhe shëndetësore, të mbledhura nga Administrata Tatimore, ISSH dhe FSDKSH, periudhën Janar-Shtator 2026, u realizuan në shumën 150.9 miliardë lekë, 15.9 miliardë lekë ose 13.5% më shumë se 9-mujori 2025 si dhe me realizim prej 100.5% të planit për 9-mujorin 2026.

Të ardhurat tatimore të mbledhura nga administrata doganore (të ardhurat nga TVSH në import, akciza, taksa doganore dhe renta minerare), për periudhën Janar-Shtator 2026, u realizuan në vlerën 186.3 miliardë lekë, 7.6 miliardë lekë ose 4.3% më shumë se 9-mujori i vitit 2025, me realizim në masën 98.3% të planit të periudhës.

Të ardhurat nga TVSH në import, për periudhën Janar-Shtator 2026, janë 122.6 miliardë lekë, 4.8 miliardë lekë ose 4% më shumë se 9-mujori i vitit 2025, si dhe realizim 97.6% të planit për periudhën 9-mujore 2026.

Të ardhurat nga akciza, për periudhën Janar-Shtator 2026, janë realizuar në shumën 54.5 miliardë lekë, 2.2 miliardë lekë ose 4.2% më shumë se 9-mujori i vitit 2025, një realizim në masën 99.8% të planit për 9-mujorin 2026.

Të ardhurat e arkëtuara nga renta minerare në eksport, për periudhën Janar-Shtator 2026, janë në shumën 1.5 miliardë lekë, ose 1.5% më shumë se e njëjta periudhë e një viti më parë dhe realizim prej 110.7 % kundrejt planit të 9-mujorit 2026.

Të ardhurat nga taksat doganore, për periudhën Janar-Shtator 2026, janë në vlerën 7.7 miliardë lekë, 654 milionë lekë ose 9.3% më shumë se periudha 9-mujore e vitit 2025, si dhe realizim prej 97.8% të planit të periudhës.

Shpenzimet:

Shpenzimet e përgjithshme publike, për periudhën 9-mujore të vitit 2026, arritën në rreth 556.3 miliardë lekë me një realizim në masën 92.8% të planit të periudhës, ndërsa krahasuar me të njëjtën periudhë të vitit 2025 ky zë ka rezultuar 7.5% më i lartë ose rreth 39 miliardë lekë më shumë.

Shpenzimet kapitale, për periudhën 9-mujore të vitit 2026, rezultuan në rreth 62.8 miliardë lekë, një realizim në masën 75.2% të planit të periudhës. Krahasuar me të njëjtën periudhë të një viti më parë ky zë ka rezultuar 5.3% më i lartë ose rreth 3.1 miliardë lekë më shumë.

Shpenzimet korente, për periudhën 9-mujore të vitit 2026, rezultuan në rreth 493.5 miliardë lekë, një realizim në masën 95.7% të planit të periudhës, ku peshën kryesore e zënë shpenzimet për fondet speciale me 42.8% të totalit të shpenzimeve korente. Krahasuar me të njëjtën periudhë të një viti më parë, zëri i shpenzimeve korente ka rezultuar 7.8% më i lartë ose rreth 35.9 miliardë lekë më shumë.