Kreu i Partisë Demokratike, Sali Berisha, ka hedhur një sërë akuzash ndaj vëllait të kryeministrit Edi Rama, Olsi Rama, si dhe ndaj ish-ministrave, zyrtarëve dhe drejtuesve të institucioneve. Gjatë një deklarate publike, Berisha i cilësoi ata si pjesë të asaj që e quajti “organizata kriminale e Edi Ramës”, duke ngritur pretendime për përfshirje në veprimtari kriminale, korrupsion dhe afera me pronat publike.
Në qendër të deklaratës së tij ishte Olsi Rama, për të cilin kreu demokrat pretendoi se ka lidhje me dosjen e Xibrakës dhe me veprimtarinë e call-centerave. Berisha pretendoi gjithashtu se vëllai i kryeministrit ka përfituar 38 mijë metra katrorë tokë përmes tri vendimeve të qeverisë, duke akuzuar Edi Ramën se ka favorizuar të afërmin e tij.
“Po ky? Olsi Rama erdhi nga Miçigani dhe mblodhi grupin e tij të lojërave të fatit dhe drogës dhe e solli në Shqipëri. Anëtar kryesor i Xibrakës, me dokumente. Dhe sot ky me Oltën janë patronë publikë të call-centerave, këtyre çerdheve të krimit. Ka marrë 38 mijë metra katrorë me tre vendime qeverie. U janë marrë tokat privatëve dhe i janë dhënë nga i vëllai”, deklaroi Berisha.
Kreu i PD-së përmendi edhe projektin e parkut industrial në Porto Romano, duke ngritur pikëpyetje për mënyrën e përzgjedhjes së personave të përfshirë në të. Ai pretendoi se Olsi Rama kishte sjellë në Shqipëri një person nga Kina për t’i dhënë parkun industrial.
Gjatë deklaratës, Berisha publikoi një listë me emra të ish-ministrave dhe zyrtarëve, mes tyre Saimir Tahiri, Lefter Koka, Alqi Bllako, Belinda Balluku, Ilir Beqaj, Erion Veliaj, Olta Xhaçka dhe Mimi Kodheli. Ai i akuzoi ata për përfshirje në afera të ndryshme, përfshirë çështje që lidhen me inceneratorët, koncesionet në shëndetësi, prokurimet publike dhe administrimin e institucioneve.
Berisha ngriti akuza edhe për drejtues të policisë dhe zyrtarë të tjerë, duke pretenduar se kanë pasur lidhje me grupe kriminale ose janë përfshirë në veprimtari korruptive. Në listën e tij përmendi edhe Mirlinda Karçanajn, Plarent Ndrecën, Taulant Tushën, Mariglen Qaton, Redi Mollën dhe Ergys Vjerdhon.
Deklarata e kreut demokrat përmbante akuza të shumta ndaj personave të përmendur. Pretendimet e tij, përfshirë ato për Olsi Ramën dhe lidhjet e pretenduara me dosjen e Xibrakës, call-centerat dhe përfitimin e tokave, nuk paraqiten në materialin e deklaratës të shoqëruara me dokumente që të mundësojnë verifikimin e tyre.
