Kreu i Lëvizjes “Shqipëria Bëhet”, Adriatik Lapaj, ka reaguar ndaj deklaratave të kryeministrit Edi Rama për ish-ushtarakun Ergys Llanajn, anëtar kryesie i Lëvizjes ‘Shqipëria Bëhet’.
Në reagimin e tij, Lapaj kundërshton pretendimet e Ramës për precedentë penalë dhe lidhje të mundshme të Llanajt me Iranin, duke iu referuar vendimeve gjyqësore lidhur me dy arrestimet e tij gjatë vitit 2026.
Sipas Lapajt, më 4 janar 2026, Llanaj u arrestua së bashku me tre drejtues të tjerë të Lëvizjes “Shqipëria Bëhet”, gjatë protestës përpara Kryeministrisë. Ai thekson se gjykata i vlerësoi arrestimet si të paligjshme dhe se, me vendimin nr. 3488 Akti, datë 28 shtator 2026, u vendos pushimi i procedimit penal, me arsyetimin se fakti penal nuk ekzistonte.
Lapaj i referohet edhe arrestimit të dytë të Llanajt, më 18 tetor 2026, duke deklaruar se edhe në këtë rast gjykata e vlerësoi arrestimin si të paligjshëm.
“Në vend që të kërkojë falje për veprimet e policisë së tij, Kryeministri zgjedh të hedhë akuza të reja. Nëse disponon prova për shkelje të ligjit, le t’ua paraqesë institucioneve kompetente”, shprehet Lapaj në reagimin e tij.
Kreu i “Shqipëria Bëhet” vë në dukje gjithashtu karrierën e Llanajt në ushtrinë shqiptare, ku ai ka shërbyer për 18 vite, si dhe formimin e tij akademik, duke theksuar se ka tre mastera shkencorë, gradën doktor dhe titullin avokat.
Lapaj e cilëson të papranueshme përdorimin e akuzave publike ndaj një qytetari, ndërsa kërkon që pretendimet për lidhje me Iranin të mbështeten me prova.
Në përfundim të reagimit, ai thekson se Lëvizja “Shqipëria Bëhet” do të vijojë protestat dhe kundërshtimin ndaj qeverisë, duke deklaruar se nuk do të tërhiqet përballë arrestimeve dhe asaj që e cilëson si përpjekje për intimidim të protestuesve.a.b
