Policia ka zbardhur ngjarjen e rëndë të ndodhur mesditën e sotme në Kukës, ku tre të mitur, 16 vjeç, mbetën të plagosur me mjet prerës pas një konflikti për motive të dobëta.
Sipas njoftimit zyrtar të Policisë, ngjarja ka ndodhur rreth orës 13:35, në rrugën “Lidhja e Prizrenit”, jashtë ambienteve të një bilardoje.
I dyshuari për plagosjen është një 16-vjeçar me inicialet A. G., i cili dyshohet se ka goditur me thikë tre bashkëmoshatarët e tij, banues në Has dhe shokë klase me të.
Të plagosurit janë transportuar fillimisht në Spitalin Rajonal të Kukësit për të marrë ndihmën e nevojshme mjekësore. Më pas, dy prej tyre janë dërguar në Prizren për trajtim më të specializuar.
Pas ngjarjes, shërbimet e Policisë kanë bërë të mundur kapjen dhe shoqërimin e 16-vjeçarit të dyshuar për plagosjen, për veprime të mëtejshme procedurale. Gjithashtu, është kapur dhe shoqëruar edhe një tjetër 16-vjeçar, i dyshuar si përkrahës i autorit të dyshuar.
Gjatë veprimeve hetimore, policia ka sekuestruar në cilësinë e provës materiale edhe mjetin prerës të përdorur në ngjarje.
Grupi hetimor, nën drejtimin e Prokurorisë, vijon punën për të sqaruar plotësisht rrethanat dhe për të dokumentuar ligjërisht ngjarjen.
