Ministri i Infrastrukturës dhe Energjisë, Enea Karakaçi, ka inspektuar zyrën postare Nr. 5 në Tiranë, një nga pikat kryesore të shërbimit postar në kryeqytet, ku qytetarët mund të kryejnë një gamë të gjerë veprimesh postare dhe financiare.
Gjatë vizitës, i shoqëruar nga administratori i Postës Shqiptare, Etjen Xhafaj, ministri u njoh me ecurinë e punës dhe shërbimet që ofrohen në këtë zyrë. Pavarësisht situatave të ditëve të fundit dhe dëmtimit të ambienteve, puna ka vijuar normalisht, ndërsa sportelet kanë qëndruar të hapura për qytetarët.
Administratori i Postës Shqiptare bëri të ditur se institucioni ofron aktualisht 61 shërbime, prej të cilave 19 janë postare dhe 42 financiare. Sipas tij, synimi është zgjerimi i mëtejshëm i shërbimeve, me përfshirjen e shitjes së policave të sigurimit dhe shpërndarjes së pakove nga tregtia elektronike.
“Posta ka për momentin 61 shërbime, nga të cilat 19 janë postare, 42 janë shërbime financiare. Ne jemi duke shtuar edhe dy-tre shërbime të tjera, të cilat nuk i kemi pasur më përpara”, deklaroi Xhafaj, duke shtuar se së shpejti pritet të firmosen edhe kontratat për shpërndarjen e pakove që vijnë kryesisht nga Kina.
Zyra postare Nr. 5 ofron shërbime edhe gjatë fundjavës, me qëllim që të jetë sa më pranë nevojave të qytetarëve.
Gjatë vizitës, ministri Karakaçi shprehu mirënjohjen për punonjësit e kësaj zyre, veçanërisht për përkushtimin e treguar gjatë ditëve të fundit, kur puna është përballur me vështirësi.
“Vizita ime ishte për t’ju thënë të gjitha zonjave dhe grave që punojnë këtu, faleminderit për përkushtimin që bëjnë çdo ditë të vitit, por edhe sigurisht edhe në një moment pak jo të këndshëm që e bënte pak më sfiduese”, u shpreh ministri.
Karakaçi theksoi se Posta Shqiptare është një prej institucioneve më të vjetra dhe më të konsoliduara në vend, duke nënvizuar rëndësinë e vijimit të shërbimeve edhe në situata të vështira.
“Është shumë e rëndësishme të jepet mesazhi që shërbimet vazhdojnë, nuk ndalohen. Patjetër që ne kemi qenë të hapur dhe vazhdojmë të jemi të hapur në çdo ditë edhe me oraret e përcaktuara. Jemi përsëri këtu për dhënien e të gjitha shërbimeve, marrjen e pensioneve, pagesave të faturave, pagesave të gjobave, apo çdo element tjetër”, deklaroi Karakaçi.