Cameron Winklevoss, në të djathtë, dhe Tyler Winklevoss gjatë konferencës Token2049 në Singapor, më 7 tetor
Disa nga investitorët më të njohur të hershëm në Bitcoin po përballen sërish me njëri-tjetrin. Këtë herë, ata synojnë të përfitojnë nga rritja e jashtëzakonshme e një prej kriptomonedhave kryesore me performancën më të spikatur të këtij viti.
Mes atyre që po ndihmojnë në nxitjen dhe po përfitojnë nga rritja prej rreth 3 000% e Zcash, një token që mbron privatësinë dhe u mundëson zotëruesve të tij të fshehin transaksionet, janë Cameron dhe Tyler Winklevoss, bashkëthemelues të platformës Gemini, si dhe Barry Silbert, themeluesi i konglomeratit të kriptomonedhave Digital Currency Group.
Binjakët Winklevoss po rikthehen te strategjia që i ndihmoi të bëheshin miliarderë gjatë rritjes së Bitcoin. Ata investuan në këtë kriptomonedhë që në fazat e hershme dhe ndërtuan biznese rreth saj. Silbert e zbuloi Bitcoin-in afërsisht në të njëjtën periudhë me vëllezërit, në vitin 2012. Ai ndoqi një rrugë të ngjashme, duke investuar herët dhe duke krijuar fonde që u mundësuan të tjerëve të përfitonin nga rritja e tij.
Tani, të dyja palët po investojnë shuma të mëdha në operacionet e minimit të Zcash dhe po konkurrojnë për të tërhequr investitorë përmes fondeve rivale.
Gjatë viteve që pasuan, vëllezërit Winklevoss dhe Silbert kanë qenë herë partnerë e herë rivalë, si gjatë bumit të kriptomonedhave, ashtu edhe gjatë rënies së tregut në vitin 2022. Një përplasje e bujshme mes tyre ndodhi pas krizës së programit Gemini Earn. Kohët e fundit, të dyja palët e kanë përqendruar vëmendjen te ekosistemi Zcash, duke nxitur një garë për dominim si në produktet e investimit në Wall Street, ashtu edhe në infrastrukturën e kësaj kriptomonedhe, shkruan Bloomberg.
“Me Zcash po përjetojmë sërish të njëjtën histori”, tha Cameron Winklevoss, president i Gemini, gjatë një prezantimi në konferencën Token2049 në Singapor, në fillim të këtij muaji. “Nëse do të kishit një makinë kohe dhe do të ktheheshit në vitin 2013, çfarë do të bënit ndryshe dhe si do të vepronit? Mendoj se shumica e njerëzve do të thoshin se do të kishin blerë më shumë Bitcoin dhe do ta kishin blerë më herët. Tani e keni atë mundësi me Zcash.”
Barry Silbert
E lançuar rreth një dekadë më parë, Zcash ka tërhequr sërish interes, mes shqetësimeve në rritje se inteligjenca artificiale po e bën më të lehtë gjurmimin e aktiviteteve financiare të njerëzve në zinxhirët publikë të blloqeve (blockchain). Një valë rrëmbimesh dhe grabitjesh të dhunshme që kanë shënjestruar investitorët në kriptomonedha ka shtuar gjithashtu shqetësimet për ekspozimin e pasurisë së tyre.
Të dyja palët mund të përfitojnë nga interesi në rritje për Zcash, edhe pse konkurrojnë për të siguruar pjesën e tyre të biznesit që lidhet me të. Asnjëra palë nuk i ka cilësuar publikisht investimet e saj si një garë kundër tjetrës, ndërsa rritja e çmimit ka tërhequr edhe një grup më të gjerë investitorësh. Vëllezërit Winklevoss dhe Silbert nuk pranuan të komentonin për Bloomberg News.
Shkëndija që nxiti rritjen e Zcash erdhi në mars të vitit 2025, kur një vendim historik i një gjykate amerikane ndihmoi në largimin e një pjese të pasigurive që rrethonin të ashtuquajturat monedha të privatësisë (privacy coins). Kjo nxiti figura të njohura të tregut, si Arthur Hayes, ta promovonin tokenin si një alternativë mbrojtëse ndaj Bitcoin-it, gjatë asaj që në atë kohë ishte një rritje rekord e kriptomonedhës origjinale.
“Gjithçka nisi me një narrativë, pasi privatësia u kthye sërish në një temë të nxehtë. Investitorë të njohur nisën ta promovonin Zcash si një lloj Bitcoin-i privat dhe më pas erdhën investimet e mirëfillta”, tha Thomas Probst, analist kërkimor në kompaninë Kaiko.
Si vëllezërit Winklevoss, ashtu edhe Silbert kanë vepruar me shpejtësi për të krijuar një rrjet kompanish konkurruese. Cypherpunk Technologies Inc. dhe Fortitude Mining, të mbështetura përkatësisht nga binjakët dhe Silbert, janë bërë dy nga kompanitë më të mëdha që minojnë këtë kriptomonedhë. Kompanitë pritet të shpenzojnë dhjetëra miliona dollarë shtesë për kapacitete kompjuterike, në përpjekje për të siguruar një pjesë më të madhe të shpërblimeve nga minimi.
Duhet sqaruar se, ashtu si në rastin e minimit të Bitcoin-it, procesi i krijimit të tokenit vendas të Zcash, ZEC, është një garë me shumë zero: minatorët konkurrojnë për një sasi të kufizuar tokenësh që emetohen periodikisht, ndërsa ndikimi i drejtpërdrejtë i këtij procesi mbi çmimin është i kufizuar. Sa më e madhe të jetë fuqia kompjuterike që zotëron një minator, aq më të mëdha janë gjasat që ai të marrë shpërblimin në tokenë për përpunimin e transaksioneve në rrjet.
“Ne besojmë se Zcash përfaqëson një nga mundësitë më tërheqëse në fushën e aseteve digjitale”, deklaroi Silbert në një dokument të depozituar në qershor.
Në gusht, Grayscale, kompania e DCG-së, u bë e para që lançoi në SHBA një fond të tregtuar në bursë (ETF) për Zcash, duke krijuar një kanal të drejtpërdrejtë për investimet institucionale. ETF-ja u krijua duke shndërruar një fond besimi që Grayscale kishte hapur në vitin 2013 për investitorët e akredituar. Ashtu si Bitcoin, Zcash ka një kufi maksimal të përcaktuar të ofertës, dhe kjo mungesë relative e ofertës ka ndihmuar në përforcimin e rritjes së çmimit, ndërsa po hyjnë kapitale të reja.
“Pati një përpjekje të koordinuar nga disa blerës ose minatorë të mëdhenj, si në SHBA, ashtu edhe në Kinë”, tha Ethan Vera, drejtor operativ i kompanisë së shërbimeve të minimit të kriptomonedhave Luxor Technology. Që atëherë, shtoi ai, kjo prirje është “përshkallëzuar si një ortek”.
Fortitude deklaroi se, pas instalimeve më të fundit, synon të arrijë 20% të kapacitetit të minimit të rrjetit. Ndërkohë, Cypherpunk zotëron rreth 20% të fuqisë së minimit të të gjithë rrjetit.
Në fillim të këtij muaji, vëllezërit Winklevoss paraqitën kërkesën për krijimin e ETF-së së tyre për Zcash.
