Tetë shtete ngritën padi kundër OpenAI të mërkurën, duke pretenduar se kompania e inteligjencës artificiale i ka çorientuar përdoruesit lidhur me sigurinë e ChatGPT-së.

Paditë e së mërkurës, të paraqitura nga prokurorët e përgjithshëm të këtyre shteteve në gjykatat përkatëse, vijnë në një kohë kur përfaqësuesit më të lartë ligjorë të shteteve, si demokrate ashtu edhe republikane, po përpiqen të sfidojnë industrinë në rritje të inteligjencës artificiale.

Prokurorët e përgjithshëm pretendojnë se mungesa e masave mbrojtëse nga ana e kompanisë ka nxitur vetëvrasjen, vetëlëndimin dhe dhunën mes përdoruesve të saj, përfshirë adoleshentët. Ata gjithashtu pretendojnë se veprimtaria e kompanisë shkel procedura të ndryshme ligjore shtetërore.

“OpenAI e dinte se produkte kaq të fuqishme kërkonin masa mbrojtëse të mirëfillta. Drejtuesit e saj i kanë pranuar publikisht rreziqet, ndërsa punonjësit e kompanisë kanë ngritur vazhdimisht shqetësime serioze për sigurinë”, thuhet në padinë e paraqitur në Arkansas.

“Ndërsa këto paralajmërime shtoheshin, OpenAI nuk e ngadalësoi ritmin. Përkundrazi, vazhdoi me të njëjtin intensitet, duke publikuar modele gjithnjë e më të fuqishme, pa masa të përshtatshme mbrojtëse apo testime të mjaftueshme, ndërsa rritja dhe fitimet morën vazhdimisht përparësi ndaj sigurisë.”