Elon Musk raportohet se ka investuar rreth 1 miliard dollarë në Skydance, grupin mediatik të drejtuar nga David Ellison, në një zhvillim që vjen pas bashkimit me vlerë 111 miliardë dollarë të Paramount me Warner Bros. Discovery.

Marrëveshja bashkon disa prej emrave më të mëdhenj të industrisë amerikane të medias dhe argëtimit, përfshirë studiot filmike Paramount dhe Warner Bros., platformën HBO Max, si dhe rrjetet televizive CBS News dhe CNN. Ky konsolidim krijon një grup të fuqishëm mediatik, ndërsa investimi i Musk shton një tjetër lidhje mes sipërmarrësit miliarder dhe familjes Ellison.

Sipas raportimeve të “The Guardian”, investimi vjen në një kohë kur marrëdhëniet mes Musk dhe familjes Ellison po forcohen. David Ellison është djali i Larry Ellison, bashkëthemeluesit miliarder të kompanisë Oracle dhe një prej mbështetësve të presidentit amerikan Donald Trump.

Larry Ellison kishte investuar më herët 1 miliard dollarë në blerjen e rrjetit social X nga Musk, duke krijuar një lidhje të rëndësishme financiare mes dy miliarderëve.

Bashkimi i kompanive pritet të shoqërohet edhe me shkurtime të ndjeshme të vendeve të punës. Drejtuesit e Skydance kanë paralajmëruar se grupi synon të kursejë mbi 6 miliardë dollarë gjatë tre viteve të ardhshme, ndërsa vlerësimet e zyrtarëve në Los Anxhelos flasin për mundësinë e humbjes së rreth 4,500 vendeve të punës në industrinë e filmit dhe televizionit vetëm në këtë zonë.

Marrëveshja ka hasur gjithashtu kundërshtime nga një grup prej 12 shtetesh amerikane, të cilat kanë shprehur shqetësime për pasojat që përqendrimi i këtij pushteti mediatik mund të ketë në konkurrencën e tregut, çmimet për konsumatorët dhe larminë e përmbajtjeve që u ofrohen publikut.

Investimi i Musk dhe bashkimi i kompanive mediatike vijnë në një periudhë ristrukturimi të industrisë amerikane të argëtimit, ku kompanitë po kërkojnë të ulin kostot dhe të forcojnë pozitat e tyre në një treg gjithnjë e më konkurrues.