Një nga pamjet më karakteristike të New York-ut mund të bëhet së shpejti pjesë e historisë. Karrocat turistike të tërhequra nga kuajt, që prej më shumë se një shekulli e gjysmë qarkullojnë në Central Park, pritet të ndalohen përfundimisht në vitin 2028.
Marrëveshja për t’i dhënë fund kësaj tradite është arritur mes kryebashkiakut Zohran Mamdani dhe kryetares së Këshillit Bashkiak, Julie Menin. Nisma shënon një ndryshim të rëndësishëm për një atraksion që ka qenë prej dekadash pjesë e përvojës turistike në qytet.
Çështja ka qenë prej vitesh në qendër të debateve, veçanërisht për shkak të shqetësimeve të organizatave për mbrojtjen e kafshëve lidhur me kushtet në të cilat punojnë kuajt. Kundërshtimet janë shtuar edhe pas disa ngjarjeve të rënda të regjistruara në Central Park dhe në zonat përreth tij.
Një prej incidenteve më tragjike ndodhi verën e kaluar, kur turisti i ri indian Romanach Mahajan humbi jetën pasi një kalë doli jashtë kontrollit gjatë një vizite me familjen e tij. Edhe gjatë vitit paraardhës, autoritetet kishin raportuar të paktën tetë incidente serioze brenda parkut ose në afërsi të tij.
Reagime të shumta kishte shkaktuar edhe ngordhja e kalit Ryder, katër vite më parë. Kafsha u rraskapit për shkak të temperaturave të larta, ndërsa rasti nxiti thirrje të reja për t’i dhënë fund përdorimit të kuajve në transportin e turistëve.
Me zbatimin e ndalimit të parashikuar për vitin 2028, New York-u do të lërë pas një traditë të njohur, e cila për shumë vizitorë ka qenë e lidhur ngushtë me imazhin romantik të Central Park.
Vendimi synon t’i japë fund një praktike të debatuar prej vitesh, ndërsa njëkohësisht shënon ndryshimin e një prej simboleve historike të jetës turistike në metropolin amerikan.
