Më shumë se gjysma e personave të arrestuar pas një operacioni anti-drogë të zhvilluar më 5 shtator në Sarandë dhe Ksamil kanë përfituar lirinë nga Gjykata e Sarandës dhe Gjykata e Apelit. Nga 20 personat e arrestuar fillimisht me urdhër të Prokurorisë, aktualisht në qeli ndodhen vetëm 9.
Operacioni kishte në fokus shpërndarjen e lëndëve narkotike cannabis dhe kokainë. Të dyshuarit ishin hetuar për më shumë se një muaj me metoda proaktive, ndërsa gjatë ndërhyrjes policore u sekuestruan edhe dy armë zjarri.
Sipas dosjes hetimore, në identifikimin e personave të dyshuar për shpërndarjen e drogës ndihmuan edhe blerjet e simuluara, të kryera me autorizimin e Prokurorisë nga një oficer i policisë gjyqësore dhe një person i koduar me emrin “Tatuazhi”.
Megjithatë, më shumë se një muaj pas operacionit, një pjesë e konsiderueshme e të arrestuarve kanë përfituar masa më të lehta sigurie.
Andrea Babi, Bledar Kovaçi, Elvis Demçaj, Nikolin Rakipi dhe Flatun Lalaj u lanë në masën e sigurisë “Arrest në shtëpi” tre ditë pas operacionit.
Më 15 tetor, Gjykata e Apelit vendosi të njëjtën masë për Arlind Osmanin, Redian Arizin, Xhuliano Mejdinin, Nazif Refitajn dhe Korado Omerin. Ndërsa më 21 tetor, Gjykata e Sarandës la në “Arrest në shtëpi” edhe Klerjan Popshinin.
Në burg kanë mbetur Feliks Filja, Altin Arapi, Erjon Dido, Medi Myftaraj, Dhimitri Terolli, Fabjo Berhamaj, Vasil Kaci, Devis Saliaj dhe Shefqet Bezhani. Sipas të dhënave të dosjes, dy të fundit u kapën gjatë operacionit me armë zjarri.
Mes personave që vijojnë të qëndrojnë në burg janë edhe Dhimitri Terolli dhe Erjon Dido, për të cilët artikulli raporton se janë përdorues të lëndëve narkotike. Për Terollin thuhet gjithashtu se është ekzaminuar për disa probleme shëndetësore.
