Gavi e vlerëson Lamine Yamalin si futbollistin më të mirë në botë aktualisht dhe shpreson që shoku i tij te Barcelona të fitojë Topin e Artë në vitin 2026.
Mesfushori spanjoll vuri në dukje edhe karakterin e vendosur të Yamalit, qëndrimin e tij dhe aftësinë për t’i mbështetur me vepra ato që thotë.
Të lidhura
None found
“Secili mund të sillet ashtu siç dëshiron. Për mendimin tim, Lamine është më i miri në botë për momentin. Ai ka mentalitetin e duhur dhe përqendrimin që i nevojitet në ndeshje, sidomos në ato më të rëndësishmet”, u shpreh Gavi.
Ai shtoi se Yamal nuk shpërqendrohet nga gjëra të tjera, por përqendrohet te loja dhe te detyrat e tij. Gavi beson se, nëse vazhdon kështu, gjithçka do t’i ecë mirë.
Sipas tij, Yamal shkëlqen në disa drejtime: kontrollon mirë topin, i kupton bashkëlojtarët dhe ndihmon që ata të luajnë më mirë. Gavi tha se këto janë ndër cilësitë që e veçojnë më shumë.
Edhe pse dëshiron që Yamal të marrë Topin e Artë, Gavi shprehu vlerësim të madh për Ousmane Dembele dhe Kylian Mbappe. Ai tha se me Dembele ka një marrëdhënie të afërt dhe e konsideron vëlla.
“U gëzova shumë kur Ousmane fitoi Topin e Artë. Ai e ka merituar gjithmonë dhe unë kam pasur besim tek ai. Tani shpresoj që një tjetër vëlla për mua, Lamine, ta fitojë këtë çmim”, tha Gavi.
Për Mbappen, ai nënvizoi se francezi shënon shumë, por nuk ka pasur mundësi të fitojë trofe. Kjo, sipas Gavit, nuk e ndryshon faktin se Mbappe është ndër lojtarët më të mirë në botë dhe e dëshmon vazhdimisht këtë.
“Kush nuk e sheh këtë, është i verbër, apo jo? Kylian është futbollist i jashtëzakonshëm dhe përbën rrezik të madh”, shtoi ai.
Gavi theksoi se fitimi i trofeve ndikohet edhe nga rrethanat e ekipit dhe nga bashkëlojtarët. Prandaj, mungesa e titujve nuk do të thotë se Mbappe pati një sezon të dobët apo më pak të mirë se të tjerët. Ai e cilësoi sezonin e francezit të jashtëzakonshëm, por përsëriti dëshirën që Topi i Artë t’i shkojë Yamalit.
