Deputeti i PDK-së, Rrustem Mustafa, ka bërë thirrje për unitet dhe përgjegjësi shtetërore në mbrojtje të katër ish-krerëve të UÇK-së në Hagë, gjatë fazës së Apelit që pason aktgjykimin dënues të shkallës së parë.
Sipas Mustafës, ligji dha efektin e nevojshëm politik dhe shtetëror, duke bashkuar qëndrimin e përbashkët dhe duke hapur rrugën përpara. Ai theksoi se mbrojtja e bashkëluftëtarëve tani kërkon punë të pandërprerë në rrafshin juridik, diplomatik dhe shtetëror.
Të lidhura
None found
Mustafa e cilësoi votimin në Kuvendin e Kosovës për ndryshimin e Ligjit për Dhomat e Specializuara, zgjedhjen e Presidentes dhe thirrjet e përbashkëta “UÇK” si dëshmi se uniteti kombëtar mund të arrihet.
Në postimin e tij, të hapur me fjalët “Uniteti kombëtar, përgjegjësi shtetërore” dhe “Epoka e Re!”, ai rikujtoi thirrjen e përsëritur tri herë: “UÇK! UÇK! UÇK!”. Sipas tij, këto veprime treguan se bashkimi është jo vetëm i mundur, por edhe i domosdoshëm kur bëhet fjalë për interesin e atdheut.
Ai kërkoi maturi, vendosmëri dhe bashkërendim mes institucioneve, në mënyrë që e vërteta të dëgjohet dhe të drejtat e bashkëluftëtarëve të mbrohen me çdo mjet ligjor e diplomatik. Mustafa tha se kjo përgjegjësi qëndron mbi partitë, interesat dhe llogaritjet politike.
Duke e quajtur luftën çlirimtare pjesë të historisë dhe dinjitetit kombëtar, ai tha se detyrimi ndaj atdheut, ndaj atyre që sakrifikuan dhe ndaj brezave të ardhshëm duhet t’i bashkojë të gjithë. Mustafa paralajmëroi se përpjekjet për ta përdorur këtë çështje për interesa të ngushta nuk do të kenë sukses.
Ai e mbylli postimin me thirrjen për unitet, seriozitet dhe veprim të përbashkët, me dinjitet e përgjegjësi deri në fund.
