Prokuroria e Fierit ka përfunduar hetimet për vrasjen e 56-vjeçarit Anesti Rama, ngjarje e ndodhur më 23 korrik 2025 në fshatin Frashër të Patosit, dhe ka dërguar për gjykim vajzën e tij, Ermalinda Rama, si dhe bashkëshorten e viktimës, Valbona Rama.
Sipas organit të akuzës, 26-vjeçarja dyshohet se e vrau të atin duke i shtrënguar qafën me një lak teli, ndërsa nëna e saj akuzohet se ndërhyri për të penguar zbulimin e së vërtetës, duke pastruar vendin ku ndodhej trupi dhe duke larë atë përpara mbërritjes së Policisë.
Ngjarja e rëndë ndodhi rreth orës 23:00 në banesën e familjes Rama. Nga hetimet dyshohet se Ermalinda Rama i shkaktoi të atit asfiksi, e cila solli vdekjen e menjëhershme.
Pas ngjarjes, vajza kishte njoftuar autoritetet se babai i saj kishte ndërruar jetë në rrethana aksidentale. Megjithatë, dyshimet e ngritura gjatë veprimeve të para hetimore çuan në vijimin e hetimeve për të përcaktuar shkakun e vdekjes.
Sipas Prokurorisë, Valbona Rama, bashkëshortja e viktimës, dyshohet se pastroi ambientin ku u gjet trupi dhe lau trupin e 56-vjeçarit, me qëllim ndryshimin ose fshehjen e gjurmëve që mund të ndihmonin në zbardhjen e plotë të ngjarjes.
Hetimet u kryen nga specialistët e Seksionit për Hetimin e Krimeve të Rënda në Drejtorinë Vendore të Policisë Fier, në bashkëpunim me Prokurorinë. Në përfundimet e saj, organi i akuzës mori në konsideratë deklarimet e administruara, ekspertimin mjekoligjor, këqyrjen e vendit të ngjarjes, sendet e sekuestruara dhe provat e tjera të mbledhura.
Në atë kohë, Policia bëri të ditur se 26-vjeçarja kishte pranuar autorësinë e krimit, ndërsa nëna e saj ishte shoqëruar për t’u hetuar lidhur me rolin e dyshuar në pastrimin e trupit të viktimës.
Në përfundim të hetimeve, Ermalinda Rama është dërguar në gjyq për veprën penale “Vrasja për shkak të marrëdhënieve familjare”, parashikuar nga neni 79/a i Kodit Penal. Valbona Rama akuzohet për “Veprime që pengojnë zbulimin e së vërtetës”, sipas nenit 301 të Kodit Penal.
Tashmë do të jetë gjykata ajo që do të shqyrtojë provat dhe do të vendosë mbi përgjegjësinë penale të dy të pandehurave. Të dyja prezumohen të pafajshme deri në marrjen e një vendimi gjyqësor të formës së prerë.