Policia italiane ka identifikuar personin që dyshohet se qëndron pas faqes në Instagram “Movimento 17 ottobre”, e lidhur me mobilizimet e fundit në vend. Sipas raportimeve të mediave italiane, bëhet fjalë për një 30-vjeçar me origjinë marokene, shtetas italian i brezit të dytë, i cili është shoqëruar në komisariatin e Milanos për t’u marrë në pyetje.
I riu raportohet se banon zyrtarisht në provincën e Breshias. Ndërkohë, policia ka kryer kontrolle edhe në banesën e një të njohure të tij, në periferi të Milanos. Identifikimi vjen në kuadër të hetimeve pas përplasjeve dhe akteve të dhunës që shoqëruan protestat e 17 dhe 18 tetorit.
Sipas agjencisë italiane të lajmeve ANSA, kontrolle policore janë kryer në 18 qytete, ndaj rreth 100 personave të identifikuar në lidhje me trazirat, mes tyre 51 të mitur. Një ditë më pas, autoritetet njoftuan për më shumë se 150 kontrolle në Milano, Monza dhe rreth 20 qytete të tjera, kryesisht në rajonin e Lombardisë.
Hetimet u zgjeruan pas zbulimit të një bisede të dyshimtë në telefonin e një të riu të përfshirë në përplasjet në Milano. Sipas dokumenteve të njoftuara personave të kontrolluar, në këtë grup komunikimi dyshohet se diskutoheshin veprime të lidhura me protestat.
Ndërkohë, për këtë të shtunë janë paralajmëruar manifestime të reja në disa qytete italiane. Lëvizja “Movimento 17 ottobre” ka bërë të ditur se pikat e grumbullimit do të njoftohen në momentin e fundit, ndërsa autoritetet kanë shtuar masat e sigurisë pas incidenteve të fundjavës së kaluar.