Kryeministri Edi Rama ka përsëritur ftesën për dialog ndaj studentëve dhe të rinjve që prej ditësh protestojnë në Tiranë, duke vendosur këtë herë një tavolinë të madhe prej guri, të rrethuar me karrige, përpara godinës së Kryeministrisë.
Në pamjet e publikuara në rrjetet sociale, mbi tavolinë shfaqet mbishkrimi “Dialog”, ndërsa përreth saj janë vendosur ulëse prej guri dhe druri. Kjo është një tjetër përpjekje simbolike e kreut të qeverisë për të ftuar protestuesit në bisedime.
Në ditët e mëparshme, Rama kishte vendosur karrige prej druri dhe ulëse prej betoni përpara Kryeministrisë, duke u bërë thirrje studentëve të ulen për të dialoguar.
Megjithatë, ftesat e mëparshme nuk janë pranuar nga protestuesit, të cilët vijojnë të kundërshtojnë dialogun me kryeministrin dhe të kërkojnë dorëheqjen e tij.
Ndërkohë, protestat në Tiranë vijojnë, ndërsa studentëve u janë bashkuar edhe pedagogë, artistë dhe qytetarë të tjerë në mbështetje të kërkesave të tyre.