Kremlini: Përgatitje për një takim trepalësh Putin–Trump–Xi në nëntor, jashtë tryezës Evropa dhe Zelensky
Kanë nisur përgatitjet për një takim të mundshëm trepalësh mes presidentit amerikan Donald Trump, presidentit rus Vladimir Putin dhe presidentit kinez Xi Jinping. Lajmi është bërë i ditur nga Yuri Ushakov, këshilltar për politikën e jashtme të Kremlinit.
Në një intervistë për televizionin shtetëror rus “Vesti”, Ushakov deklaroi se Rusia, Kina dhe Shtetet e Bashkuara kanë rënë dakord në parim për organizimin e takimit në nivel presidentësh.
Sipas tij, takimi mund të zhvillohet në kuadër të samitit të Bashkëpunimit Ekonomik Azi-Paqësor (APEC), i cili do të mbahet më 18 dhe 19 nëntor në Shenzhen të Kinës.
Ushakov foli edhe për mundësinë e një takimi mes përfaqësuesve të Rusisë, SHBA-së dhe Ukrainës gjatë muajit nëntor. Ai sqaroi se një takim i tillë do të synonte të vlerësonte mundësitë për arritjen e një marrëveshjeje paqeje për Ukrainën.
Këshilltari i Kremlinit konfirmoi gjithashtu se Rusia ka marrë një ftesë zyrtare nga Uashingtoni për samitin e G20, që sipas deklaratës pritet të zhvillohet në dhjetor në Miami të Floridës.
Megjithatë, pjesëmarrja e Vladimir Putinit nuk është konfirmuar ende. Sipas Ushakovit, vendimi do të varet edhe nga rezultatet e takimeve diplomatike që pritet të zhvillohen në Kinë gjatë nëntorit.
Ai theksoi se fillimisht vëmendja do të përqendrohet te takimet e nëntorit dhe më pas do të vendoset për pjesëmarrjen e presidentit rus në samitin e G20.
Shqetësim në Evropë për një marrëveshje pa Ukrainën
Mundësia e një takimi mes Trump, Putin dhe Xi Jinping ka ngritur shqetësime në Evropë, veçanërisht për rrezikun që vendime të rëndësishme për sigurinë evropiane të merren pa pjesëmarrjen e Ukrainës dhe të vendeve evropiane.
Ish-kryeministri ukrainas Arseniy Yatsenyuk ka paralajmëruar se marrëveshjet mes SHBA-së, Rusisë dhe Kinës mund të ndikojnë në sigurinë e Evropës. Ai e krahasoi mundësinë e një marrëveshjeje pa Ukrainën me Konferencën e Mynihut të vitit 1938 dhe atë të Jaltës në vitin 1945.
Nga ana tjetër, presidenti ukrainas Volodymyr Zelensky ka deklaruar vazhdimisht se asnjë marrëveshje që prek sovranitetin apo kufijtë e Ukrainës nuk mund të arrihet pa miratimin e Kievit.
