Udhëheqësja e opozitës venezueliane dhe fituesja e Çmimit Nobel për Paqen, Maria Corina Machado është kthyer në vendin e saj të lindjes pas një sërë përpjekjesh të dështuara për t’u kthyer dhe gati një viti në mërgim.
Machado njoftoi rikthimin e saj nëpërmjet një postimi në rrjetet sociale X, në të cilin shkroi “Unë jam këtu. Me ty”.
Machado ishte larguar fshehurazi nga Venezuela në dhjetor 2025 për të marrë Çmimin Nobel për Paqen. Vetëm disa javë më vonë, forcat amerikane kapën udhëheqësin e hershëm të vendit, Nicolas Maduro, dhe e transportuan atë me aeroplan në Nju Jork për t’u përballur me akuza penale.
Machado e ka lavdëruar shumë Presidentin e SHBA-së Donald Trump për nisjen e operacionit të rrezikshëm, megjithëse Uashingtoni i ka lejuar zëvendëses së Maduros, Delcy Rodriguez, të qeverisë si presidente e përkohshme.
Sipas partisë së saj, Machado u përpoq të kthehej shtatë herë gjatë tre muajve të fundit, nga Shtetet e Bashkuara dhe Panamaja. Ata thonë se ajo u bllokua vazhdimisht nga autoritetet venezueliane.
Shumë veta besonin se Uashingtoni luajti një rol në bllokimin e kthimit të Machados, duke pasur parasysh shprehjet e përsëritura të kënaqësisë së Trump me Rodriguezin.
Ky pretendim është mohuar nga Sekretari i Shtetit i SHBA-së, Marco Rubio. Machado i ka kaluar muajt e fundit duke u përpjekur të rifitojë vendin e saj në skenën politike të Venezuelës, ndërsa bisedimet për të ardhmen e vendit kanë ecur përpara pa qenë ajo në gjendje të marrë pjesë drejtpërdrejt nga brenda.
Javën e kaluar, ajo u bëri thirrje venezuelanëve të dilnin në rrugë dhe kërkoi që të caktohej një datë për zgjedhjet presidenciale, një nga kërkesat e saj kryesore ndaj qeverisë së Delcy Rodriguez. Ajo e kishte akuzuar qeverinë e Rodriguez se kishte frikë nga kthimi i saj.
The post Maria Corina Machado kthehet në Venezuelë pas 10 muajsh në mërgim appeared first on Euronews Albania.
Burimi: Botë
