“Kurrë më tiranë në vendin tonë”, ishte mesazhi i parë i Ilija Srdanoviqit, kandidatit të parë të Listës Studentore, pas zgjedhjeve parlamentare në Serbi, ku projeksionet e para tregojnë një fitore të thellë të studentëve ndaj presidentit Aleksandar Vuçiç.
Deklarata e Srdanoviqit erdhi në një atmosferë festive në shtabin zgjedhor të Listës Studentore, ku kandidatët dhe mbështetësit shpërthyen në festime pas publikimit të projeksioneve të para të rezultateve. Sipas Radio Evropa e Lirë në gjuhën serbe, në selinë e studentëve nuk munguan muzika dhe lotët e gëzimit.
Të pranishmit brohoritën “Pumpaj”, një nga parullat më të njohura të protestave masive të studentëve kundër pushtetit të Vuçiçit, të cilat kanë tronditur Serbinë.
Festimet janë përhapur edhe në rrugët e Beogradit, ku mijëra qytetarë janë mbledhur në qendër të kryeqytetit për të festuar rezultatin e projektuar. Në rrugë janë ndezur flakadanë, ndërsa drejtuesit e automjeteve kanë përdorur boritë në shenjë gëzimi.
Pamjet nga kryeqyteti serb tregojnë turma njerëzish të mbledhur në rrugë, drita të kuqe nga flakadanët dhe një atmosferë entuziazmi pas publikimit të projeksioneve zgjedhore.
Sipas projeksioneve të para të Ipsos dhe CeSID, të transmetuara nga televizioni serb N1, Lista Studentore ka marrë 52 për qind të votave, kundrejt 39,3 për qind të listës së Aleksandar Vuçiçit.
Në bazë të këtyre të dhënave, studentët pritet të sigurojnë 138 mandate në Parlamentin e Serbisë, ndërsa lista e presidentit serb 104 mandate. Nëse konfirmohen nga rezultatet zyrtare, këto shifra do t’i jepnin Listës Studentore shumicën absolute parlamentare.
Ndërkohë, vetë Vuçiçi ka pranuar humbjen, duke deklaruar se lista e mbështetur nga studentët pritet të marrë numrin më të madh të mandateve.
“Është e qartë se ne i kemi humbur këto zgjedhje”, deklaroi presidenti serb.
Rezultatet e publikuara deri tani mbeten projeksione paraprake, ndërsa rezultati përfundimtar pritet të konfirmohet nga Komisioni Republikan Zgjedhor i Serbisë. m.k
