Presidentja e Kosovës, Justina Shiroka-Pula, ka reaguar këtë të hënë lidhur me vrasjen e një gruaje në Vitomiricë të Pejës, duke kërkuar nga institucionet e drejtësisë që rasti të hetohet me urgjencë, në mënyrë të plotë dhe të paanshme.

Ajo ka theksuar se hetimet duhet të përfshijnë jo vetëm rrethanat e vrasjes, por edhe mënyrën se si janë trajtuar më herët kërkesat e viktimës dhe veprimet e institucioneve përgjegjëse për mbrojtjen e saj.

Sipas raportimeve, gruaja, tri ditë para se të vritej, i ishte drejtuar përmes një letre kryeprokurores së Prokurorisë së Pejës, ku kishte shprehur pakënaqësinë për mënyrën se si zyrtarët po trajtonin rastin e saj. Në reagimin e saj, Pula ka kërkuar të sqarohet nëse institucionet kishin ndërmarrë të gjitha masat e nevojshme për vlerësimin e rrezikut dhe garantimin e sigurisë së viktimës.

Presidentja u ka bërë thirrje organeve të drejtësisë që të veprojnë me profesionalizëm, paanshmëri dhe shpejtësi, në mënyrë që të zbardhen të gjitha rrethanat dhe personat përgjegjës të përballen me drejtësinë. Ajo ka nënvizuar se siguria dhe dinjiteti i grave duhet të jenë përgjegjësi themelore e institucioneve dhe se çdo dyshim për moskryerjen e detyrave në mbrojtjen e tyre duhet të marrë përgjigje të qartë.

“Mbrojtja e jetës së grave është detyrim i panegociueshëm, ndaj nuk ka kompromis kur ajo vihet në rrezik”, ka theksuar Pula, duke ritheksuar domosdoshmërinë që institucionet të garantojnë mbrojtjen e jetës dhe sigurisë së çdo gruaje.