Murali kushtuar legjendës së Milanit, Franco Baresi, është vandalizuar sërish pranë selisë së klubit kuqezi, Casa Milan. Ngjarja ka shkaktuar zemërim te gazetari Carlo Pellegatti, i cili denoncoi incidentin përmes një videoje të publikuar në Instagram.

“E pabesueshme dhe e turpshme! Kanë dëmtuar sërish imazhin e kapitenit tonë Franco Baresi”, shkroi Pellegatti, duke treguar gjendjen në të cilën është lënë vepra artistike.

Sipas gazetarit italian, vandalët kanë lyer me të zezë pjesë të rëndësishme të muralit, përfshirë Kupën, shiritin e kapitenit dhe logon. “Kisha ardhur këtu, përpara selisë së Milanit. E gjithë Kupa është mbuluar me bojë të zezë, ashtu si shiriti i kapitenit dhe logoja. Turp!”, u shpreh ai me indinjatë.

Ky nuk është rasti i parë që vepra kushtuar Baresit bëhet objekt vandalizmi. Vetëm pak javë më parë, artisti Luca Rosada, i njohur si Lucas Street Art, kishte rikthyer muralin e restauruar pranë Casa Milan, pasi versioni i parë ishte dëmtuar nga persona të panjohur.

Pas incidentit të ri, artisti reagoi edhe në komentet e postimit të Pellegattit, duke shprehur keqardhje për atë që ka ndodhur, por edhe vendosmërinë për të mos u dorëzuar.

“Fatkeqësisht, duket se nuk ka fund për të keqen, por, për fat të mirë, as unë nuk do të dorëzohem. Do të rikthehem për ta riparuar, në respekt të Franco Baresit”, shkroi Rosada.

Franco Baresi është një nga figurat më të rëndësishme në historinë e Milanit, ku kaloi pjesën më të madhe të karrierës dhe u shndërrua në simbol të klubit. Vandalizimi i përsëritur i muralit të tij ka ngjallur zemërim, ndërsa artisti ka premtuar se do të ndërhyjë sërish për ta rikthyer veprën në gjendjen e mëparshme.