Agjencia e Inteligjencës së Rumanisë njoftoi të hënën se ka zbuluar një rrjet sabotimi të koordinuar nga Rusia, të cilin autoritetet rumune e lidhin me një zjarr që shpërtheu në shtator në një strukturë industriale në pjesën qendrore të vendit, pranë një kompanie shtetërore të prodhimit të armëve.
Sipas deklaratës së agjencisë, personat që dyshohet se koordinonin aktivitetin nga Rusia kishin përcaktuar një sërë objektivash në zonë, përfshirë objekte shtetërore dhe private të prodhimit të armëve, si dhe struktura të tjera me rëndësi ushtarake dhe industriale.
Hetimet kanë konfirmuar përfshirjen e disa shtetasve nga ish-shtetet sovjetike, të cilët banonin në vende të Bashkimit Evropian, bëri të ditur agjencia rumune e inteligjencës.
Në lidhje me këtë çështje, autoritetet po zhvillojnë procedura ligjore në Rumani, në bashkëpunim me institucionet përkatëse të disa vendeve evropiane.
Sipas autoriteteve, tre shtetas të huaj, dy bjellorusë dhe një ukrainas, janë nën hetim për aktivitetin e dyshuar.
Zbulimi vjen në një kohë kur vendet evropiane kanë ngritur shqetësime për kërcënimet ndaj sigurisë dhe infrastrukturës së tyre strategjike. Rusia, nga ana e saj, ka mohuar vazhdimisht akuzat se qëndron pas akteve të sabotimit në Evropë.
Autoritetet rumune nuk kanë dhënë në deklaratën e tyre detaje të mëtejshme mbi identitetin e personave nën hetim apo mbi ecurinë e procedurave ligjore.
