Komisioni Evropian ka miratuar një plan masash për platformën kineze të tregtisë elektronike Temu, me synimin për të forcuar kontrollet dhe për të parandaluar shitjen e produkteve të paligjshme në tregun online. Kompania ka katër muaj kohë për të zbatuar masat e kërkuara.

Plani parashikon identifikimin më të mirë të rreziqeve, kontrolle më të rrepta ndaj produkteve të ofruara nga shitësit dhe shqyrtimin e mënyrës se si algoritmet e platformës u rekomandojnë artikuj përdoruesve.

Vendimi i Brukselit vjen pas shqetësimeve se Temu nuk kishte vlerësuar në mënyrë të mjaftueshme rreziqet që lidhen me shitjen e produkteve të paligjshme. Testimet e kryera nga autoritetet evropiane kishin evidentuar probleme sigurie te disa karikues dhe lodra për foshnja, përfshirë produkte që nuk përmbushnin standardet e kërkuara.

Masat mbështeten te detyrimet e përcaktuara nga Akti për Shërbimet Digjitale (DSA), sipas të cilit platformat e mëdha online duhet të identifikojnë rreziqet që lidhen me shërbimet e tyre dhe të marrin masa për t’i kufizuar ato.

Rregullat synojnë të rrisin mbrojtjen e konsumatorëve dhe të pengojnë qarkullimin e produkteve që mund të përbëjnë rrezik për shëndetin dhe sigurinë e tyre.

Komisioni Evropian do të mbikëqyrë zbatimin e planit, i cili do t’i nënshtrohet gjithashtu një auditimi të jashtëm dhe të pavarur. Nëse kompania nuk përmbush detyrimet e përcaktuara, Brukseli mund të ndërmarrë hapa të tjerë ligjorë.

Megjithatë, miratimi i planit nuk do të thotë se të gjitha produktet e shitura në Temu janë kontrolluar apo se rreziqet janë eliminuar plotësisht. Efektiviteti i masave do të vlerësohet gjatë zbatimit të tyre.