Harry Kane është emri i madh i ditës dhe i vitit në futbollin botëror. Sulmuesi anglez është shpallur fitues i Topit të Artë, duke pasuar Ousmane Dembélé-në, në ceremoninë e zhvilluar në teatrin Palladium të Londrës.

Kane, i cili ishte një nga favoritët kryesorë së bashku me Lamine Yamal, triumfoi përballë talentit të Barcelonës. Kështu, spanjolli mbetet sërish pa Topin e Artë në një vit kur ka fituar Kupën e Botës, duke përsëritur atë që ndodhi në vitin 2010. Në atë kohë, Lionel Messi fitoi çmimin përpara Andrés Iniestës dhe Xavi Hernándezit.

Juria përbëhej nga 100 gazetarë të përzgjedhur nga France Football, që përfaqësonin 100 vendet e para në renditjen e FIFA-s. Ata vlerësuan paraqitjet e futbollistëve gjatë periudhës nga 1 gushti 2025 deri më 31 korrik 2026. Sipas Marca-s, votuesit i dhanë përparësi performancës individuale të Kane, përpara sukseseve kolektive të Yamalit, i cili fitoi Kupën e Botës.

Kane e fitoi çmimin e parë të Topit të Artë në qytetin ku lindi 33 vjet më parë. Në ceremoni ai u shoqërua nga bashkëshortja e tij, Katie Goodland, prindërit dhe mjeku sportiv personal, Alejandro Elorriaga.

Sezoni i jashtëzakonshëm i Kane

Në aspektin kolektiv, sulmuesi anglez fitoi tripletën e trofeve në Gjermani: Superkupën e vitit 2026, Kupën e Gjermanisë për sezonin 2025-2026 dhe Bundesligën. Me kombëtaren angleze, ai përfundoi në vendin e tretë në Kupën e Botës, duke shënuar gjashtë gola në shtatë ndeshje.

Në planin individual, Kane fitoi Këpucën e Artë evropiane dhe u shpall golashënuesi më i mirë i Bundesligës për të tretin sezon radhazi, me 36 gola. Ai u përfshi gjithashtu në formacionin ideal të Champions League.

Nga gushti 2025 deri në korrik 2026, Kane shënoi 73 gola në 65 ndeshje për Bayernin dhe Anglinë. Vetëm Lionel Messi ka regjistruar një shifër më të lartë në një sezon, me 82 gola në 69 ndeshje në sezonin 2011-2012.

Me fanellën e Bayernit, anglezi realizoi 61 gola dhe dha shtatë asistime në të gjitha kompeticionet gjatë sezonit 2025-2026. Në Champions League, ai shënoi 13 gola, duke u renditur pas Kylian Mbappé-së, i cili realizoi 15.

Kane shënoi në çdo raund eliminator të Champions League dhe Kupës së Gjermanisë. Me 14 gola, ai renditet gjithashtu i pesti mes golashënuesve më të mirë në historinë e Kupës së Botës.